मुंबई : पश्चिम रेल्वेच्या दक्षता पथकाने एसी लोकल ट्रेनमधील एका प्रवाशाला चार हजार ८०० रुपयांचा बोगस एसी तिमाही सीझन तिकीट (क्यूएसटी) पाससह रंगेहात पकडण्यात आले. अमन नखरानी (२१) असे आरोपीचे नाव असून तो सॉफ्टवेअर इंजिनिअर आहे. व्हिडिओ एडिटिंग अ‍ॅपच्या वापर करून अनेकदा बनावट पास बनवले आणि ते आपल्या मित्रांना आणि नातेवाईकांना वितरित केल्याचे निष्पन्न झाले.

पश्चिम रेल्वेने दिलेल्या माहितीनुसार, १२ जून २०२३ रोजी पश्चिम रेल्वेच्या तिकीट तपासणी आणि दक्षता पथकांनी केलेल्या नियमित तपासणीदरम्यान सदर प्रवासी चर्चगेट-बोरिवली एसी लोकलमध्ये प्रवास करत होता. तिकीट मागितल्यावर त्या व्यक्तीने त्याचे यूटीएस तिकीट दाखवले, पण तिकीट तपासनीसांना ते संशयास्पद वाटले. (Latest Marathi News)

तिकीट तपासणी कर्मचार्‍यांनी त्याला सीझन तिकीट दाखवण्यासाठी त्याचे युटीएस अ‍ॅप उघडण्यास सांगितले, ज्यावर अमन नखरानीने उत्तर दिले की माझ्याकडे दुसर्‍या फोनमध्ये पास आहे आणि माझ्या सध्याच्या फोनवर त्याची फोटो नाही. तिकीट तपासणी कर्मचार्‍यांनी पासच्या तपशीलाची पडताळणी करण्यासाठी यूटीएस नियंत्रण कक्षाकडे चौकशी केली. त्यानंतर ही पास बनावट असल्याचे आढळले. (Marathi Tajya Batmya)

या प्रकरणाचा अधिक तपास करताना, दक्षता पथकाला आढळून आले की, नखरानी यांनी सीझन तिकिटाच्या तपशीलांमध्ये फेरफार करण्यासाठी व्हिडिओ एडिटिंग अ‍ॅप 'व्हीएन अ‍ॅप' वापर केला होता. त्याने अनेक वेळा हेराफेरी करून बनावट पास बनवले आणि ते आपल्या मित्रांना आणि नातेवाईकांना वितरित केल्याचे निष्पन्न झाले.

अधिक तपास केल्यानंतर त्याच्या फोनमधून ४८ हजार रुपये किमतीची ११ युटीएस तिकिटे जप्त करण्यात आली, जी बनावट होती. आरोपी व्यक्तीला नंतर खोटेपणाच्या आरोपावरून पुढील कारवाईसाठी जीआरपी अंधेरीकडे सोपवण्यात आले आणि एफआयआर नोंदवल्यानंतर त्याला अटक करण्यात आली.