नवी मुंबई : मुंबई, नवी मुंबई (Mumbai-navi mumbai) परिसरातून प्रवासी रिक्षांची चोरी करणाऱ्या (Rickshaw robbery) एका सराईत चोरट्याला गुन्हे शाखा मध्यवर्ती कक्षाने अटक (thief arrested) केली. मुस्लिमुद्दीन हाफीज्जूर रेहमान शेख (२७) असे या चोरट्याचे नाव असून, त्याने विविध भागांतून चोरलेल्या तब्बल पाच लाख ६५ हजार किमतीच्या नऊ प्रवासी रिक्षा गुन्हे शाखेने (crime branch) जप्त केल्या. तो चोरलेल्या रिक्षांच्या भागांची विक्री करत असल्याचे तसेच चेसीस व इंजिनची अदलाबदल करून रिक्षा विकत असल्याचे तपासात आढळून आल्याची माहिती गुन्हे शाखेचे पोलिस उपायुक्त सुरेश मेंगडे (suresh mengade) यांनी दिली.

उपायुक्त सुरेश मेंगडे यांच्या मार्गदर्शनाखाली प्रवासी रिक्षा चोरणाऱ्या आरोपींना पकडण्यासाठी शोधमोहीम सुरू होती. या वेळी गोवंडी बैंगनवाडीतील मुस्लिमुद्दीन शेख हा रिक्षांची चोरी करत असल्याची माहिती गुन्हे शाखेला मिळाली. याद्वारे वरिष्ठ पोलिस निरीक्षक विजयसिंह भोसले, सहायक निरीक्षक राजेश गज्जल व पथकाने दहिसर मोरी भागात सापळा रचून शेख याला ताब्यात घेतले. त्याच्याकडून तब्बल पाच लाख ६५ हजार किमतीच्या एकूण नऊ चोरीच्या प्रवासी रिक्षा हस्तगत केल्या.