मुंबई : सांताक्रूझ (पश्चिम), जे डब्ल्यू मेरियट हॉटेलसमोरील तळमजला अधिक चार मजली जुहू रेसिडेन्सी हॉटेलमध्ये आज सायंकाळी पाचच्या सुमारास आग लागली. या आगीची माहिती मिळताच अग्निशमन दलाच्या जवानांनी तात्काळ घटनास्थळी धाव घेऊन अवघ्या २० मिनिटात आग विझवली. तसेच, या आगीमुळे हॉटेलमध्ये अडकलेल्या १२ जणांची सुखरूप सुटका केली.

सुदैवाने या दुर्घटनेत कोणी जखमी नाही

जुहू रेसिडेन्सी या तळमजला अधिक चार मजली हॉटेलमध्ये नेहमीप्रमाणे ग्राहक, पर्यटकांची ये - जा सुरू असताना हॉटेलमध्ये अचानकपणे आग लागल्याची घटना घडली या आगीची माहिती मिळताच हॉटेलमध्ये आणि परिसरात एकच खळबळ उडाली. सदर हॉटेलमधील कर्मचाऱयांनी प्रथम आग विझविण्याचा प्रयत्न केला. मात्र काही अवधीतच आग भडकली. अग्निशमन दलाच्या जवानांनी तात्काळ घटनास्थळी धाव घेऊन मदतकार्य युद्धपातळीवर सुरू केले. आगीमुळे हॉटेलमध्ये धावपळ सुरू झाली होती.

अनेक ग्राहक, पर्यटक आगीपासून बचाव होण्यासाठी हॉटेलबाहेर सुरक्षित ठिकाणी धाव घेतली. तर या आगीमुळे हॉटेलच्या तिसऱ्या व चौथ्या मजल्यावर १२ जण अडकले होते. अग्निशमन दलाच्या जवानांनी त्यांना सुरक्षित बाहेर काढले. अग्निशमन दलाच्या जवानांनी अथक प्रयत्न करून ४ फायर इंजिन, ३ जंबो वॉटर टँकर यांच्या साहाय्याने आगीवर नियंत्रण मिळविले. आग सायंकाळी ५.२१ वाजता पूर्णपणे विझविली. त्यामुळे हॉटेलमधील कर्मचारी, मालक, पर्यटक, ग्राहक यांनी सुटकेचा निःश्वास सोडला. मात्र सदर हॉटेलमध्ये आग का व कशी काय लागली याबाबत स्थानिक पोलीस आणि अग्निशमन दलाचे संबंधित अधिकारी अधिक तपास करीत आहेत.