Navi Mumbai Crime: अज्ञात लुटारूने सीएसएमटी-पनवेल लोकलमधून प्रवास करणाऱ्या सेवानिवृत्त नौदल अधिकाऱ्याच्‍या हातातील २१ हजार रुपये किमतीचा मोबाईल खेचून चोरी केल्‍याची घटना शुक्रवारी सकाळी सानपाडा रेल्वेस्थानकात घडली.

वाशी रेल्वे पोलिसांनी या प्रकरणातील चोरट्याविरोधात जबरी चोरीचा गुन्हा दाखल करून त्याचा शोध सुरू केला आहे.

या प्रकरणातील तक्रारदार महेश डुगर सिंग (वय ५९) हे उलवे सेक्टर-१९ मध्ये राहण्यास असून ते नौदलातील सेवानिवृत्त अधिकारी आहेत. मानखुर्द येथे नेव्हीचा दवाखाना असल्याने महेश सिंग हे शुक्रवारी सकाळी मानखुर्द येथील दवाखान्यात औषधे आणण्यासाठी गेले होते. औषधे घेतल्यानंतर त्यांनी उलवे येथे परतण्यासाठी मानखुर्द येथून पनवेल लोकल पकडली होती.

सकाळी ११ वाजता सदर लोकल सानपाडा रेल्वेस्थानकात थांबून जुईनगरच्या दिशेने निघाली असताना, सदर लोकलच्या डब्यामध्ये असलेल्या चोरट्याने महेश सिंग यांच्या हातातील मोबाईल जबरदस्तीने खेचून धावत्या लोकलमधून उडी मारून पलायन केले. यावेळी लोकलने वेग घेतल्याने महेश सिंग यांना काहीही करता आले नाही. त्यानंतर त्यांनी वाशी रेल्वे पोलिस ठाणे गाठून तक्रार दाखल केली.