Mumbai Local News: भारतरत्न डॉ. बाबासाहेब आंबेडकर यांच्या जयंतीनिमित्त रविवारी चैत्यभूमीवर बाबासाहेबांना अभिवादन करण्यासाठी लाखोंच्या संख्येत अनुयायांचा महासागर पाहायला मिळतो. मात्र, पश्चिम रेल्वे तर्फे रविवारी मेगाब्लॉक घेण्यात आलेला होता.

त्यामुळे आंबेडकरी जनतेची गैरसोय लक्षात घेऊन पश्चिम रेल्वेने रविवारी घेण्यात आलेल्या नियोजित मेगाब्लॉक रद्द केला आहे. त्यामुळे आंबडेकरी अनुयायांना मोठा दिलासा मिळणार आहे.

उपनगरी रेल्वे मार्गावरील रुळांची दुरुस्ती तसेच सिग्नल यंत्रणेत काही तांत्रिक कामे करण्यासाठी रविवारी १४ एप्रिल २०२४ रोजी तिन्ही मार्गावर नियोजित मेगाब्लॉक घेण्यात येणार आहे. मध्य रेल्वेच्या ठाणे ते कल्याण अप- डाऊन धीम्या मार्गावर तर हार्बर मार्गावरील कुर्ला ते वाशी अप- डाऊन मार्गावर मेगाब्लॉक असणार आहे.

पश्चिम रेल्वेच्या बोरिवली ते गोरेगाव अप- डाऊन जलद मार्गावर मेगाब्लॉक असणार आहे. त्यामुळे मोठ्या प्रमाणात चैत्यभूमी येथे बाबासाहेब यांना अभिवादन करण्यासाठी येणाऱ्या आंबेडकरी जनतेची मोठी गैरसोय होणार होती.

याकरिता शिवसेना (उध्दव बाळासाहेब ठाकरे) पक्षातर्फे शिवसेना नेते अनिल देसाई यांनी सदर मेगाब्लॉक रद्द करण्याची आग्रही मागणी मध्य आणि पश्चिम रेल्वेच्या महाव्यवस्थापकांना पत्राद्वारे केली होती. या पत्राची दखल घेत पश्चिम रेल्वेने रविवारी घेण्यात आलेल्या नियोजिती मेगाब्लॉक रद्द केला आहे.