गेल्या कित्येक दिवसांपासून प्रतीक्षा असलेल्या उरण ते खारकोपर लोकल मार्ग अखेर सुरू झाली आहे. या सुविधेमुळे उरण तालुक्यात राहणारे शहरी व ग्रामीण भागातील नागरिक नवी मुंबई शहराशी जोडले गेले आहेत; पण दुसरीकडे स्थानकांपर्यंत येण्यासाठी रिक्षांशिवाय पर्याय नसल्याने प्रवासखर्च वाढला आहे. उरण परिसरात गेल्या दोन दशकात मोठ्या प्रमाणावर शहरीकरण झाले आहे. कंटेनर यार्ड तसेच गोदामांमुळे मुंबई, नवी मुंबई, पनवेल शहरातून मोठ्या प्रमाणात नागरिक उरण परिसरात येत आहेत.

तसेच उरणमधूनही नागरिक, विद्यार्थी शिक्षण व कामधंद्यासाठी मुंबई नवी मुंबईत जातात. त्यामुळे उरणकरांचा प्रवास सुकर होण्यासाठी नेरूळ उरण रेल्वे सुरू करण्यात आली आहे; पण उरण परिसरातील शहरी तसेच ग्रामीण भाग उरण रेल्वे स्थानकांपासून काही अंतरावर असल्याने स्थानक गाठताना द्राविडी प्राणायाम करावा लागत आहे.

न्हावा-शेवा रेल्वे स्थानक जवळ आहे; तर द्रोणागिरी नोडमधील नागरिकांना बोकडविरा गावाच्या हद्दीत असणारे द्रोणागिरी हे रेल्वे स्थानक जवळ पडत आहे. उरण पूर्व विभाग ते नवघर गावाच्या हद्दीत असणारे न्हावा-शेवा स्टेशन येथील रिक्षाचे भाडे शेअरिंगमध्ये ३० रुपये आहे; तर एकट्या व्यक्तीला शंभर रुपये मोजावे लागत आहेत. त्यामुळे नागरिकांच्या सोयीसाठी परिवहनच्या बस सुरू करण्याची मागणी उरण परिसरातील नागरिकांमधून होत आहे.

उरण परिसरात नवीनच लोकल रेल्वे सुरू झाली आहे. मी उरण पूर्व विभागातून लोकल रेल्वेने प्रवास करत आहे. दररोज येऊन रिक्षाला साठ रुपये देणे परवडण्याजोगे नाही. त्यामुळे रेल्वे स्थानक परिसरातून परिवहनच्या बस सुरू करण्यात याव्यात.
- तुषार पाटील, रहिवासी, उरण