गेल्या काही दिवसांपासून मुंबईसह संपूर्ण राज्यभरात  मुसळधार पाऊस पडत आहे. यामुळे जनजीवन विस्कळीत झाले असून मुंबईच्या विविध चौपाटीवर बुडून आतापर्यंत दहा जणांचा मृत्यू झाला आहे. अशातच मुंबईच्या प्रसिद्ध वर्सोवा चौपाटीवर फिरण्यासाठी आलेले जोडपे समुद्राला आलेल्या भरती प्रवाहात अडकून राहिले.

मात्र सुदैवाने या ठिकाणी वर्सोवा पोलीस गस्त घालत असताना भरतीच्या पाण्यात आणि ट्रायपॉड दगडांमध्ये अडकलेले जोडपे दिसून आले क्षणाचाही विलंब न करता वर्सोवा पोलिसांनी आपला जीव धोक्यात घालून या जोडप्याला सुरक्षित बाहेर काढले.

दोन दिवसापूर्वी मुंबईच्या वर्सोवा चौपाटीवर एक मद्यधुंद जोडपं फिरण्यासाठी आले. दोघेही किनाऱ्यावरील ट्रायपॉड दगडांमध्ये गप्पा मारत बसले असताना सायंकाळी पावणे सात वाजण्याच्या सुमारास समुद्राला मोठी भरती आली आणि भरतीचे पाणी किनाऱ्यावर असलेल्या ट्रायपॉड दगडांवर आढळू लागले.

मद्यधुंद अवस्थेत असलेल्या या जोडप्याला बाहेर पडणे अवघड झाले. ही गोष्ट येथील एका पर्यटकांनी गस्तीवर असलेल्या वर्सोवा पोलीस ठाण्याचे व पोलीस निरीक्षक गणेश पवार यांना सांगितली. त्यांनी त्वरित वर्सोवा पोलीस ठाण्याच्या कर्मचाऱ्यांना बोलावून घेऊन त्या मद्यधुंद जोडप्याला सुरक्षित बाहेर काढले. (latest marathi news)