Mumbai Street Dog: मुंबई-गोवा महामार्गावरील कोलाड-आंबेवाडी नाक्यावर गेल्या चार ते पाच दिवसांपासून पिसाळलेल्या श्वानाची दहशत पसरली आहे. आतापर्यंत या श्वानाने आठ जणांना चावा घेतला असून या प्रकाराने नागरिकांत भीतीचे वातावरण आहे.

कोलाड-आंबेवाडी नाक्यावरील बाजारपेठेमुळे या परिसरात नेहमी वर्दळ असते. अशातच गेल्या काही दिवसांपासून या ठिकाणी भटक्या श्वानांचे समूह आढळून येत आहेत. बाजारपेठेत खरेदीसाठी येणाऱ्यांवर तसेच शाळा, महाविद्यालयांत जाणाऱ्या विद्यार्थ्यांच्या अंगावर श्वान धावून आल्याने अनेक जण जखमी झाले आहेत.

सध्या हल्ला करण्याचे प्रकार वाढले असून आठ जण जखमी आहेत. त्यामुळे याबाबतची तक्रार ‘सह्याद्री वन्यजीव रक्षणार्थ’ या सामाजिक संस्थेकडून करण्यात आली होती. त्यानुसार या श्वानाला जेरबंद करण्यात आले असल्याने नागरिकांनी सुटकेचा निःश्वास सोडला आहे.

जागतिक आरोग्य संघटनेच्या माहितीनुसार कुत्रा चावल्यानंतर वैद्यकीय उपचारांसाठी सामान्य लोकांत फार कमी प्रमाणात माहिती आहे. यामुळे जगभरातील श्वानदंशाने होणाऱ्या मृत्यूपैकी ३६ टक्के मृत्यू एकट्या भारतात नोंदवले जातात.

- सागर दहींबेकर, अध्यक्ष, सामाजिक संघटना