राज्यासह देशभरात ईमेल, फोनच्या माध्यमातून धमक्या दिल्या जाण्याचे प्रकार थांबताना दिसत नाहीयेत. काही दिवसांपूर्वी शाळा, एअरपोर्ट, हॉस्पिटल्सना बॉम्बने उडवून देण्याची धमकी देण्यात आल्यानंतर आता मुंबई पोलिसांच्या नियंत्रण कक्षाला धमकीचा फोन आल्याची माहिती समोर आली आहे. एका अज्ञात व्यक्तीने मुंबई पोलिसांना फोन करून ताज हॉटेल आणि मुंबई विमानतळसह इतर ठिकाणी बॉम्ब ठेवल्याची धमकी दिली आहे.

आज दुपारी पोलिसांना हा फोन आला, अशी माहिती आहे. धमकीचा फोन आल्यानंतर तातडीने मुंबई पोलीस सतर्क झाले आहेत. पोलिसांनी फोन आला त्या व्यक्तीचे लोकेशन तपासले असता हा फोन उत्तर प्रदेशमधून आला असल्याचं प्राथमिक चौकशीत उघड झालं आहे. याप्रकरणी पोलीस अधिक तपास करत आहे.

त्याचबरोबर ज्या ठिकाणांवर बॉम्ब ठेवल्याची माहिती फोनवरून देण्यात आली आहे, त्या ठिकाणी पोलिसांनी बंदोबस्त वाढवला आहे. तसेच बॉम्बशोधक पथक घटनास्थळी दाखल झालं आहे. या फोननंतर पोलीस सतर्क झाले आहेत. यासंबधीचे वृत्त 'साम टिव्ही'ने दिले आहे.

केंद्रीय गृह मंत्रालयाला बॉम्बने उडवण्याची धमकी

दरम्यान काही दिवसांपुर्वी केंद्रीय गृह मंत्रालयाला बॉम्बने उडवण्याची धमकी देण्यात आली होती. धमकीचा ईमेल मिळाल्यानंतर सुरक्षा यंत्रणा अलर्ट झाल्या आणि गृह मंत्रालय बिल्डिंगमध्ये शोध मोहिम चालवण्यात आली. मात्र काहीही संशयास्पद आढळून आले नाही. इतकेच नाही तर हा ईमेल कोणी पाठवला आणि कुठून पाठवला याचा देखील तपासले गेले.