मुंबई : झोपडपट्टी पुनर्वसन योजनेत झोपडी धारकांना 500 चौरस फुटाचे घर द्या, 2019 च्या निवडणुकीत मतदान केलेल्या झोपडीधरकांच्या झोपड्यांना अधिकृत मान्यता देण्यात यावी, असा निवडणूक अजेंडा केंद्रीय सामाजिक न्याय राज्यमंत्री रामदास आठवले यांनी जाहीर केला आहे.

पालिका निवडणुकीच्या पार्श्वभूमीवर मुंबई प्रदेश  रिपब्लिकन पक्षाचा मेळावा चुनाभट्टी येथील सोमय्या मैदानात काल पार पडला. यावेळी केंद्रीय राज्यमंत्री आठवले बोलत होते. मुंबई उपनगर पालकमंत्री मंगलप्रभात लोढा, मुंबई भाजप अध्यक्ष आशिष शेलार यावेळी उपस्थित होते.

आगामी मुंबई महापालिका निवडणुकीत भाजप आरपीआय शिवसेना महायुतीचा विजय 3निश्चित आहे. मुंबई महापालिकेवर सत्ता आल्यास भाजपचा महापौर आणि आरपीआय चा उपमहापौर होईल. 5 वर्षात पहिला अडीज वर्ष टर्म उपमहापौर आरपीआय चा आणि दुसरा टर्म  उपमहापौर शिवसेना शिंदे गटाचा होईल असा विश्वास  केंद्रिय राज्यमंत्री आठवले यांनी यावेळी व्यक्त केला. 

आगामी मुंबई मनपा निवडणुकीत भाजपा आणि शिवसेना शिंदे गट यांच्या उमेदवारांना आरपीआय च्या कार्यकर्त्यांनी निवडून आणायचे असून भाजप शिवसेनेने आरपीआय च्या उमेदवारांना ही निवडुन आणण्यासाठी प्रयत्न करावेत असे आवाहन आठवले यांनी केले. भाजपचे मुंबई अध्यक्ष आमदार  आशिष शेलार यांनी 5 वर्षात पहिला उपमहापौर आरपीआयचाच होईल, असे आश्वासन दिले.

गेल्या 2019 च्या निवडणुकीत मतदान केलेल्या झोपडीधरकांच्या झोपड्यांना अधिकृत मान्यता देण्यात यावी. झोपडपट्टी पुनर्वसन योजनेत 500 फूटांचे घर देण्यात यावे तसेच खाजगी इमारतींना काल मर्यादा गुणवत्ता यासाठी रेरा प्राधिकरण आहे तसेच झोपडपट्टी पुनर्वसन योजनेसाठी ही गुणवत्ता आणि इमारती बांधण्यासाठी निश्चित कालमर्यादा पाळणासाठी रेरा सारखे प्राधिकरण असावे, मुंबईत बंजारा भवन; कक्कया भवन बांधावे आदी ठराव या मेळाव्यात मंजूर करण्यात आले.