मुंबई : देशभरात ड्रेनेज लाईन साफ करणाऱ्या कर्मचाऱ्यांच्या गुदमरून किंवा विषारी वायुमुळे मृत्यू झाल्याच्या अनेक घटना घडत असतात. मात्र मुंबईतील कांदिवली येथे एक धक्कादायक घटना घडली असून मॅनहोलमध्ये ड्रेनेजलाईन साफ करून बाहेर येत असलेल्या कामगाराच्या अंगावरून गाडी गेल्याने त्याच्या मृत्यू झाला आहे.

मुंबईच्या कांदिवली डहाणूकरवाडी परिसरातून ही धक्कादायक घटना पुढे आली आहे. डहाणूकरवाडी परिसरातील रस्त्यावरील मेन हॉल सफाई करण्यासाठी उतरलेला कर्मचारी पुन्हा बाहेर येत असताना त्याच्या अंगावरून कार गेली. कार अंगावरून गेल्यामुळे तो गंभीर जखमी झाला. ही घटना सीसीटीव्हीमध्ये कैद झाली.

कामगाराला जखमी अवस्थेत रुग्णालयात उपचार करण्यासाठी नेले असता रविवारी त्याचा उपचारादरम्यान मृत्यू झाला. याप्रकरणी पोलिसांनी कारचालक विनोद आणि कंत्रालदार अशा दोघांनाही अटक केली आहे.

पोलिसांनी दिलेल्या माहितीनुसार, या प्रकरणी चालक विनोद उधवानी यांच्यासह कंत्राटदारावरही निष्काळजीपणा केल्याप्रकरणी कलम 196 सह कलम 279, 336 आणि 338 अंतर्गत कांदिवली पोलिसांनी गुन्हा दाखल केला होता. मात्र सफाई कामगाराच्या मृत्यूनंतर पोलिसांनी या प्रकरणात कलम ३०४ जोडले आहे.

ड्रेनेज साफसफाई करताना सुरक्षेच्या योग्य उपाययोजना न केल्याप्रकरणी कंत्राटदार अजय शुक्लालाही अटक करण्यात आली आहे.