मुंबई - घाटकोपर पूर्व येथील रविवारी राजावाडी कॉलनीतील बी - ७ ही इमारत रविवारी खचून झालेल्या दुर्घटनेत ढिगाऱ्याखाली अडकलेल्या नरेश पालांडे ( ५६) व अलका महादेव पालांडे (९४) या दोघांचे मृतदेह २४ तासानंतर सोमवारी सकाळी बाहेर काढण्यात आले आहेत.

रविवारी सकाळपासून या दोघांचाही शोध सुरु होता. दरम्यान, इमारत खचल्याने सुरक्षेसाठी ही इमारत जमीनदोस्त करण्यात आली आहे.

घाटकोपर पूर्व राजावाडी कॉलनीतील बिल्डिंग नंबर बी ७ / १६६ ही इमारत खचली होती. या दुर्घटनेत ढिगा-याखाली अडकलेल्या पाचजणांपैकी रविवारी तीन जणांची सुखरुप सुटका करण्यात आली. परंतु दोन जण ढीगाऱ्याखाली अडकल्याने त्यांचा शोध सुरु होता.

अखेर २४ तासानंतर या दोघांचेही मृतदेह सापडले आहेत. शनिवारपासून मुंबईत पावसाने दमदार सुरुवात केली आहे. या पहिल्याच पावसात दुर्घटनांचे सत्र सुरु आहे. रविवारी सकाळी ९.३३ वाजण्याच्या सुमारास घाटकोपर पूर्व राजावाडी कॉलनीतील इमारत खचल्याने ही दुर्घटना घडली. या घटनेची स्थानिक पोलीसांकडून अधिक तपास सुरु असल्याचे सांगण्यात आले.