Panvel: कामाचे पैसे देण्यात टाळाटाळ करणाऱ्या सुपरवायझरची चाकूने हल्ला करून हत्या करणाऱ्या कामगाराला कळंबोली पोलिसांनी शनिवारी कल्याण रेल्वे स्थानकातून अटक केली आहे.

कळंबोलीत के.एल.-४ सोसायटीत राहणारा परवेझ अन्सारी हा नावडे तळोजा येथे एल ॲण्ड टी कंपनीत मनोज एंटरप्रायजेसच्या माध्यमातून सुपरवायझरचे काम करत होता. शुक्रवारी रात्री घरी असताना ११.३०च्या सुमारास सद्दाम हुसेनने कामाच्या पैशांच्या हिशेबासाठी परवेझ अन्सारीला कळंबोली सेक्टर-१४ मधील झुडिओ मॉलजवळ बोलावून घेतले.

परवेज अन्सारी हा आपला सहकारी मोहम्मद कौसर अन्सारी याच्यासोबत स्कुटीवरून झुडिओ मॉलजवळ गेला. यावेळी सद्दाम हुसेनने परवेझकडे कामाचे १,२५० रुपये देण्याची मागणी केली, अन्यथा सोडणार नसल्याची धमकी दिली होती. यावेळी परवेझने २० तारखेपर्यंत पैसे देणार असल्याचे सांगितले; पण त्याचा राग आल्याने सद्दामने त्याच्याजवळ असलेल्या चाकूने परवेझच्या छातीवर व हातावर अनेक वार केले.

या हल्ल्यात जखमी परवेझचा एमजीएम हॉस्पिटलमध्ये उपचारादरम्यान मृत्यू झाला. या घटनेनंतर कळंबोली पोलिसांनी सद्दाम हुसेनविरोधात गुन्हा दाखल करून त्याचा शोध सुरू केला होता. अखेर शनिवारी दुपारी कल्याण रेल्वे स्थानकातून गावी पळून जाण्याच्या प्रयत्नात असताना त्याला अटक करण्यात आली.