नवी मुंबई : ई-कॉमर्स मार्केटिंगमध्ये (E-commerce marketing) पैसे गुंतवणूक (money investment) जास्त परतावा देण्याचे प्रलोभन दाखवून एकाने उलवेतील तरुणाची तब्बल सव्वा तीन लाख रुपयांची फसवणूक (money fraud) केल्याची घटना उघडकीस आली आहे. न्हावा शेवा पोलिसांनी (nhava sheva police) या प्रकरणी गुन्हा दाखल (police fir) केला आहे.

त्रिदिवेश सातोपती (३१) हा उलवे सेक्टर-९ मध्ये राहत असून तो आयटी कंपनीत कामाला आहे. १ नोव्हेंबर रोजी त्रिदीवेश याच्या व्हॉट्सऍपवर एका व्यक्तीने पार्ट टाइम जॉबबाबत जाहिरात पाठविली होती. त्यात ५ हजार रुपये ई-कॉमर्स मार्केटिंगमध्ये गुंतवणुक केल्यास रोज ६०० ते ९०० रुपये मिळतील, अशी माहिती दिली. त्रिदिवेशने गुंतवणुकीची तयारी दाखविल्यानंतर समोरील व्यक्तीने त्‍याला लिंक पाठवून पैसे भरण्यास सांगितले. त्रिदिवेशने ४६०० रुपये भरल्यानंतर दोन तासात त्याला परतावा मिळणार असल्याचे सांगून त्याला बँक अकाउंटची माहिती भरण्यास सांगण्यात आले.

त्रिदिवेशने बँक खात्याची माहिती भरून चार टप्प्यात एकूण ४,१९८ रुपयांची रक्कम पाठवली. त्यानंतर सायबर गुन्हेगाराकडून पैसे कसे कमवायचे याची माहिती व्हॉट्सऍपद्वारे देण्यात आली. सदर व्यक्‍तीने आपली ओळख सांगताना, इंदिरा इलुमलाई अचारी या महिलेचे पॅन कार्ड व्हॉट्सऍपवर पाठवले. दोन दिवसानंतर त्रिदिवेशने किराणा दुकानादाराला ऑनलाईन पैसे पाठविण्याचा प्रयत्न करत असताना, त्याच्या फोन-पेमध्ये पैसे नसल्याचे कळले.

त्यामुळे त्याने आपल्या दोन्ही बँकेच्या खात्यांची तपासणी केली असता, त्याच्या बँक ऑफ इंडियाच्या खात्‍यातून १ लाख १४ हजार रुपये तर एचडीएफसी बँकेमधून २ लाख ११ हजार रुपये असे एकूण सव्वा तीन लाख रुपये काढुन घेण्यात आल्याचे त्याला समजले. त्रिदीवेशने गुंतवणूकीचे ऑफर देणाऱ्या व्यक्‍तीशी संपर्क करण्याचा प्रयत्‍न केला असता, फोन बंद होता. फसवणूक झाल्याचे लक्षात आल्यानंतर त्‍याने न्हावा शेवा पोलिस ठाण्यात धाव घेऊन तक्रार दाखल केली.