नवी मुंबई शहरात अनधिकृत बांधकामे, मोकाट सुटलेले फेरीवाले यांचा सुळसुळाट झाला हे. याप्रकरणी नवी मुंबई महापालिकेवर न्यायालयाने वारंवार ताशेर ओढले आहेत. याची नोंद घेत तसेच यापूर्वीच्या अनेक परिपत्रकांचा आधार घेत महापालिकेचे अतिक्रमण विभागाचे उपायुक्त डॉ. राहुल गेठे यांनी विभाग अधिकाऱ्यांना कर्तव्यात कुचराई केल्याप्रकरणी कारणे दाखवा नोटीस बजावयाला सुरुवात केली आहे.

नवी मुंबई हे सिडकोने वसवलेले नियोजित शहर आहे. या शहरामध्ये किती लोकसंख्येसाठी किती घाऊक मार्केट असावीत, दैनंदिन गरजेच्या वस्तूंची किती मार्केट असावीत याचे निकष ठरलेले आहेत. एखाद्या रहिवासी वसाहतीत किती घरे असावीत, त्यानुसार तेथील पायाभूत सुविधा कशा असाव्यात हेही ठरलेले आहेत. असे असताना या शहराला अनधिकृत बांधकामांचा विळखा पडला आहे.

त्यामुळे गावठाणातील घरे सहा मजली झाली आहेत. आशिया खंडातील सर्वांत मोठी बाजार समिती म्हणून ओळखली जाणारी नवी मुंबई कृषी उत्पन्न बाजार समितीतील गाळेधारकांनी त्यांच्या गाळ्यांवर मोठ्या प्रमाणात अनधिकृत बांधकामे केली आहेत. झोपड्या बहुमजली झाल्या आहेत. शहरात असा एकही रस्ता नाही जिथे फेरीवाल्यांनी अतिक्रमण केले नाही.

एका याचिकेच्या सुनावणीदरम्यान उच्च न्यायालयाने नवी मुंबईला फटकार लगावली. याची दखल घेत नवनियुक्त उपायुक्त डॉ. राहुल गेठे यांनी कारवाईला सुरुवात केली आहे. ज्या अधिकाऱ्यांनी अनधिकृत बांधकामांना संरक्षण दिले, ज्यांच्या काळात सर्वात जास्त अशी बांधकामे झाली, त्यांची यादी बनवण्याचे काम त्यांनी हाती घेतले आहे. त्यानुसार चालु असलेली अनधिकृत बांधकामांविषयी खुलासा करावा, अशी कारणे दाखवा नोटीस तुर्भे विभागाचे विभाग अधिकारी भरत धांडे यांना बजावण्यात आली आहे.

शाळेची मैदाने खुली करणार
शाळांची मैदाने शाळेच्या वेळेच्या व्यतिरिक्त स्थानिक मुलांना खेळण्यासाठी खुली ठेवण्याचे आदेश आहेत. पण, अनेक शाळा या आदेशाला केराची टोपली दाखवतात. अशी मैदाने खुली करण्यात येणार आहेत. पुढच्या टप्प्यात मॉल, शाळा, महाविद्यालय, आलिशान उपहारगृह, रुग्णालय, रहिवासी टॉवर हेही अतिक्रमण विभागाच्या रडारवर असल्याची माहिती सूत्रांनी दिली आहे.