मुंबई : नार्कोटिक्स कंट्रोल ब्युरोने (NCB) बुधवारी छत्रपती शिवाजी महाराज आंतरराष्ट्रीय विमानतळावरून (international airport) तीन केनिया देशाच्या महिलांना (kenya woman arrest) अटक केली आहे. त्यांच्याकडून 937.78 ग्रॅम सोने जप्त (gold seized) केले आहे. त्यांनी या सोन्याची पाकिटे गुप्तांगात लपवल्याची माहिती एनसीबीकडून देण्यात आली.

खुरेशा अली(61), अब्दुल्लाहीअब्दीया अदान(43) व अली सादीया अलो(45) अशी अटक करण्यात आलेल्या महिलांची नावे आहेत. तीन परदेशी महिला अमली पदार्थासह छत्रपती शिवाजी महाराज आंतरराष्ट्रीय विमानतळावर येणार असल्याची माहिती एनसीबीला मिळाली होती. त्यानुसार एनसीबीने बुधवारी विमानकळावर सापळा लावून तीन केनियन महिलांना ताब्यात घेतले. त्यांच्या शरीराच्या स्कॅनिंगमध्ये त्यांनी त्यांच्या गुप्त अंगात सोने लपवल्याचे उघड झाले. त्यानुसार त्यांच्यावर कारवाई करून त्यांच्याकडील 937.78 ग्रॅम सोने जप्त करण्यात आले असून हे प्रकरण पुढील कारवाईसाठी सीमाशुल्क विभागाकडे सोपवण्यात आले आहे. महिलांकडून 13 पाकीटे जप्त करण्यात आली आहेत. त्यात प्रत्येकी 20 ग्रॅम ते 100 ग्रॅम सोने होते.