नवी मुंबई : तलवारीने केक कापून वाढदिवस (Birthday celebration) साजरा करणे कामोठेतील तरुणाला व त्याच्या मित्रांना महागात पडले आहे. पोलिसांनी त्‍या तरुणासह त्याच्या ७ ते ८ मित्रांवर शस्त्र अधिनियमानुसार गुन्हा दाखल (Police fir filed) करून त्यांची धरपकड सुरू केली आहे. या तरुणांनी २२ जुलै २०२१ रोजी भररस्त्यात वाढदिवस साजरा करताना तलवारीने केक कापला (cake cut by sword) होता. त्यानंतर त्यांनी सदरचा व्हिडीओ (video viral) चार दिवसांपूर्वी सोशल मीडियावर व्हायरल करून दहशत निर्माण करण्याचा प्रयत्न केला होता.

कामोठे सेक्टर-२० भागात राहणाऱ्या ओम कांबळे या तरुणाने २२ जुलै रोजी वाढदिवस भररस्त्यात साजरा केला होता. त्यावेळी ओम याने तलवारीने केक कापला होता. त्यावेळी काढलेले व्हिडीओ सोशल मीडियावर व्हायरल झाल्‍याचे पोलिसांच्या निदर्शनास आल्यानंतर पोलिसांनी या प्रकाराची गंभीर दखल घेऊन तलवारीने केक कापणाऱ्यांचा शोध घेतला असता, त्याचे मित्र अक्षय कांबळे, किशोर रणपिसे, सागर चंदणकर, कमलेश वरखडे व इतर असल्याचे सांगितले. त्यानुसार पोलिसांनी या सर्वांवर गुन्हा दाखल केला आहे.