मिरा रोड : सध्या संचारबंदीमुळे अनेक परराज्यातील मजूर आपल्या मूळ गावापासून दूर शहारांत अडकले आहेत. अशा गरजू कामगारांना गावाकडे पाठवून देण्याच्या नावाखाली पैसे उकळणाऱ्या एका कामगार नेत्यास भाईंदरच्या नवघर पोलिसांनी अटक केली आहे.

नक्की वाचा : गावी जाण्याचे फॉर्म मिळवण्यासाठी परप्रांतीयांची ठीक-ठिकाणी गर्दी

संचारबंदीमुळे गेल्या 45 दिवसांपासून हाताला काम नसलेल्या कामगारांना पुरेसे अन्न मिळत नसल्यामुळे आपल्या मूळगावी कुटुंबाकडे जाण्याची ओढ त्यांना लागली आहे. दरम्यान सरकारने परराज्यातील कामगारांना गावी जाण्याची सुविधा उपलब्ध करून देण्याचा निर्णय घेतला आहे. याचाच फायदा समाजातील काही असामाजिक तत्वे घेत आहेत. मिरा-भाईंदरमध्ये एका संस्थेच्या माध्यमातून अडकलेल्या कामगारांना गावी पाठवण्याच्या नावाखाली मिरा-भाईंदर कामगार वेल्फेअर संस्था अध्यक्ष चंद्रशेखर जाधव हा पैसे गोळा करीत होता. याबाबत माहिती मिळताच पोलिसांनी त्याला तात्काळ अटक केली.

हे ही वाचा : BLOG: कोरोनाचा इलेक्ट्रॉनिक्स उद्योगाला जबर फटका; तर चीनची जागा घेण्याची सुवर्णसंधीही

या संदर्भात श्रमजीवी संघटनेचे मिरा-भाईंदरचे अध्यक्ष सुलतान पटेल यांच्याकडे विचारणा केली असता या व्यक्तीला आम्ही संघटनेतून काढून टाकले आहे. त्याचा आमच्या संघटनेची कोणताही संबंध नसल्याचे त्यांनी सांगितले. त्यानंतर पोलिसांनी आरोपीला भारतीय दंड संहिता 1860 चे कलम 188,269,271,290 व कोविड-19 कायदा 2020 कलम 51 ब प्रमाणे अटक केली असून पुढील तपास पोलीस करत आहेत.

Police handcuffed those who were laundering money in the name of sending them to the village