Dombivali News: कल्याण लोकसभा मतदारसंघात निवडणूकीच्या रिंगणात शिवसेनेचे ठाकरे व शिंदे गटाचे उमेदवार समोरासमोर उभे ठाकले आहेत. शिवसेना ठाकरे गटाची ताकद कमी करण्यासाठी ऑपरेशन धनुष्यबाण शिंदे गटाच्या वतीने राबविले जात असून ठाकरे गटाचे पदाधिकारी फोडून त्यांना शिंदे गटात सामील केले जात आहे.

मंगळवारी ठाकरे गटाचे डोंबिवली शहर प्रमुखांसह कल्याणचे माजी नगरसेवक पुरुषोत्तम चव्हाण यांनी शिंदे गटात प्रवेश केला होता. प्रवेशास चोवीस तास उलटत नाही तोच ते स्वगृही परतले आहेत.

मी ठाकरे गटातच, माझा बळजबरीने पक्ष प्रवेश केला गेला असल्याचे यावेळी त्यांनी प्रसिद्धी माध्यमांना सांगितले. कल्याण लोकसभेत दोन्ही गट आपली ताकद पणाला लावत असून येत्या काही दिवसांत आणखी राजकिय घडामोडी पहायला मिळतील.

कल्याण लोकसभा मतदारसंघात शिवसेना विरुद्ध शिवसेना अशी लढत पहायला मिळत आहे. शिंदे गटाकडून खासदार डॉ. श्रीकांत शिंदे यांना उमेदवारी देण्यात आली आहे. तर ठाकरे गटाकडून वैशाली दरेकर यांना उमेदवारी देण्यात आली आहे.

मंगळवारी वैशाली दरेकर यांनी आपला उमेदवारी अर्ज दाखल केला यावेळी युवा सेनेचे नेते आदित्य ठाकरे उपस्थित होते. या दरम्यानच शिंदे गटाने ठाकरे गटाला खिंडार पाडत धक्का दिला. डोंबिवली शहर प्रमुख खामकर, महिला संघटक कविता गावंड, कल्याणचे माजी नगरसेवक पुरुषोत्तम चव्हाण यांसह अनेक पदाधिकाऱ्यांनी मुख्यमंत्री एकनाथ शिंदे व खासदार श्रीकांत शिंदे यांच्या उपस्थितीत शिंदे गटात प्रवेश केला.

हा पक्ष प्रवेश होऊन चोवीस तास उलटत नाही तोच शिंदे गटास एक धक्का बसला आहे. शिंदे गटात प्रवेश केलेले माजी नगरसेवक चव्हाण यांनी मी उद्धव ठाकरे यांच्यासोबतच असे म्हणत ठाकरे गटात आपण कायम असल्याचे सांगितले आहे.

बुधवारी कल्याण पूर्वेतील वालधूनी शिवसेना शाखेत ठाकरे गटाच्या नेत्यांच्या उपस्थित पुन्हा ठाकरे गटात प्रवेश केला आहे. या वेळी कल्याण लोकसभा मतदार संघातील महाआघाडीच्या उमेदवार वैशाली दरेकर आणि ठाकरे गटाचे नेते विजय साळवी यांनी शिंदे गटावर सडेतोड टिका केली आहे.

तर माजी नगरसेवक चव्हाण यांनी मी आपल्या व्यक्तिगत कामासाठी गेलो होतो. माझा बळजबरीने पक्ष प्रवेश करुन घेतला असल्याचे सांगितले