Rahul Gandhi:  काँग्रेस नेते राहुल गांधी यांनी टिळक भवन येथे काँग्रेस कार्यकर्त्यांना संबोधित करताना शिवसेना आणि राष्ट्रवादीला टोला लगावला. राहुल गांधी इंडिया बैठकीसांठी मुंबई दौऱ्यावर आले आहेत. इंडिया आघाडीची बैठक संपल्यानंतर त्यांनी पक्षाच्या एका कार्यक्रमात कार्यकर्त्यांना संबोधित केले.

राहुल गांधी म्हणाले, महाराष्ट्रात काँग्रेस फुटली नाही. काँग्रेस हा एक विचारधारेचा पक्ष आहे. आमच्यात एकच डीएनए मिळेल. महाराष्ट्रात काँग्रेस पक्ष आजही उभा आहे. कर्नाटकमध्ये भाजपचा पराभव कोणी केला?. आपल्या शरीरातील रक्त काढले तर एकच डिएनए असेल. तो कुणाला भीत नाही. हा काँग्रेस पक्षाचा कार्यकर्ता आहे. हा बब्बर शेरचा पक्ष आहे. या पक्षात वाघिणी देखील आहेत.

भाजप, नरेंद्र मोदी आणि आरएसएसला काँग्रेस पक्षाची भीती वाटते. महाराष्ट्रात यांची सफाई होणार आहे. इंडिया आघाडी भाजपला हरवणार आहे. काँग्रेस पक्ष नक्की जिंकेल. जे कर्नाटकात झालं ते महाराष्ट्रात होईल, असे राहुल गांधी म्हणाले. 

राज्यात शिवसेनेत एकनाथ शिंदे यांनी मोठा बंड केला होता. त्यांनंतर दोन गट निर्माण झाले होते. निवडणूक आयोगाने शिवसेना पक्ष चिन्ह शिंदे गटाला दिले आहे. एकनाथ शिंदे भाजपच्या मदतीने राज्यात मुख्यमंत्री झाले. शिंदे-भाजप सरकारला एक वर्ष झाल्यानंतर अजित पवार राष्ट्रवादीतून काही आमदारांसह सत्तेत सहभागी झाले. अजित पवार देखील पक्षावर आपला दावा सांगत आहे. महाराष्ट्रातील याच घडामोडीवरुन राहुल गांधीनी ठाकरे गट आणि शरद पवार गट यांना टोला लगावला.