नेरळः जिल्हा वारकरी संप्रदायाचे प्रमुख ह.भ.प. कृष्णा महाराज लांबे यांच्या नेतृत्वाखाली खोपोली येथून पायी दिंडी नाशिक जिल्ह्यातील श्री क्षेत्र त्र्यंबकेश्‍वर येथे नेली जाते. 10 जानेवारीला खोपोली येथून निघालेली पायी डिंगी कर्जत तालुक्‍यातून आज मार्गस्थ झाली. 19 जानेवारीला 300 किलोमीटर अंतर पार करून ही दिंडी भगवान शंकराचे स्थान असलेल्या त्र्यंबक येथे पोहचणार आहे.

या रुग्णालयात डॉक्टरला मारहाण 

पाच वर्षांपूर्वी ह.भ.प. लांबे महाराज खोपोली ते त्र्यंबकेश्‍वर अशी पायी दिंडी सुरू केली आहे. 10 जानेवारीला कर्जत येथून ही दिंडी निघाली आणि रात्रीचा मुक्काम नेरळ येथे पळसकर कुटुंबीयांकडे होता. तेथे नेरळ शहर आणि परिसरातील वारकऱ्यांनी रात्रीचे जागर भजन केले. सर्वांनी अन्नदान केले.

आज नेरळ येथून निघालेल्या पायी दिंडीचे सकाळचा नाश्‍ता बिरडोळे या गावात होता. तेथे असलेल्या भगवान शंकर मंदिरात पालखीचे स्वागत ग्रामस्थांनी केले.
नंतर तेथून नेरळ-कळंब रस्त्याने ही पालखी पोशोर येथील मंदिरात विसावली. दिंडीचा कर्जत तालुक्‍यातील शेवटचा मुक्काम ठाणे जिल्हा हद्दीत असून, ही पायी दिंडी 300 किलोमीटरचे अंतर पार करून 19 जानेवारीला नाशिक जिल्ह्यातील त्र्यंबक येथे पोहचणार आहे.