मुंबई : शरद पवारांच्या (Sharad Pawar) मुंबईतील घरासमोर आंदोलक एसटी कर्मचाऱ्यांच्या धडक आंदोलनावर शिससेनेचे नेते आणि खासदार संजय राऊत (Sanjay Raut) यांनी हे आंदोलन अत्यंत दुर्देवी असल्याचे म्हटले आहे. तसेच हा अत्यंत चिंता वाटावी असा हा प्रकार असल्याचे राऊत यांनी म्हंटले आहे. (Sanjay Raut Reaction On ST Worker Protest)

एसटी संपाच्या बाबतीत सरकारने मार्ग काढण्यासाठी, तसेच मागण्या मान्य करण्यासाठी सर्व उपाययोजना आणि चर्चा केलेल्या आहेत. तसेच न्यायालयाचा निर्णदेखील त्याच पद्धतीचा असल्याचे राऊत यांनी स्पष्ट केले. याशिवाय आंदोलक कर्मचाऱ्यांच्या जवळपास सर्व मागण्या मान्य झाल्याचेही आपल्याला वाटते. तरीही कुठली तरी अन्यात शक्ती पडद्यामागून वातावरण बिघडवण्याचं आणि एका विशिष्ट गटाची डोकी भडकवतं यासाठी सातत्याने हालचाली करत असल्याचा आरोपही त्यांनी केला आहे. महाराष्ट्रातील महाविकास आघाडीचं सरकार यांच्या डोळ्यात खुपतं आणि ज्यामुळं ज्यांच्या पोटात दुखतं असे काही लोकं अशा प्रकारचे कृत्य घडवू पाहत असल्याचे राऊत म्हणाले.

ज्या पद्धतीचे आंदोलन आज आपण पाहिले आणि ज्या पद्धतीने सुप्रिया सुळे (Supria Sule) आंदोलकांमध्ये निर्भयपणे गेल्या आणि त्यांनी आंदोलकांशी हात चर्चा केली तसेच त्या हात जोडून आंदोलकांना विनंती करत होत्या. मात्र, ज्या प्रकारची भाषा आणि वर्तन आंदोलकांकडून सुरू होतं ते लोकशाहीतील कोणत्याही आंदोलनाला न शोभणारे असून, या आंदोलकांच्या मागे कोण नेते आहेत हे पहावे लागेल, असे राऊत यांनी यावेळी सांगितले.