India Alliance Sabha:

काँग्रेसच्या भारत जोडो न्याय यात्रेचा आज मुंबईत समारोप झाला. मुंबईतील शिवाजी पार्क मैदानावर इंडिया आघाडीने मोठे शक्तिप्रदर्शन केले. इंडिया आघाडीतील दिग्गज नेते शिवाजी पार्कवर आले होते. यावेळी आयोजित सभेत शरद पवार आणि उद्धव ठाकरे यांनी संबोधित केले.

देशातील परिस्थितीत बदल आणण्याची गरज आहे. दबावतंत्राविरोधात आपल्याला पाऊले उचलावी लागतील. आश्वासन पूर्ण न करणाऱ्यांना सत्तेपासून दूर करायचे आहे. नरेंद्र मोदी यांनी देशाला खोटी गॅरंटी दिली. महात्मा गांधी यांनी मुंबईतून इंग्रजांविरोधात छोडो भारत घोषणा दिली होती. आता त्याच शहरातून  छोडो भाजप असा नारा आपल्याला द्यावा लागले, असे शरद पवार म्हणाले.

यावेळी उद्धव ठाकरे यांनी देखील सभेला संबोधित केले. दिल्लीतील हुकूमशाही तडीपार करण्यासाठी शिवाजी पार्क निवडण्यात आलं. भाजप फुगा आहे आम्ही त्यात हवा भरली होती. संपूर्ण भारतात यांचे दोन खासदार होते. आम्ही त्यात हवा भरली, आता त्यांच्या डोक्यात हवा गेली.

भाजप ४०० पार म्हणतात हे काय फर्निचरचे दुकान आहे का?, असा टोला देखील उद्धव ठाकरे यांनी लगावला. मोदींच्या कुटुंबात ते आणि त्यांची खुर्चीच आहे. तोच मोदींचा परिवार आहे. घटना बदलण्यासाठी भाजपला ४०० पार हवे आहेत, असा आरोप ठाकरेंनी केला.

आपली ओळख देश असली पाहीजे. व्यक्ती म्हणजे देश व्हायला नको. देश हाच माझा धर्म आहे. आपली लढाई लोकशाही आणि देश वाचवण्यासाठी आहे. कुणीही राज्यकर्ता अमरपट्टा घेऊन येत नाही. जेव्हा जनता एकत्र येते तेव्हा हुकूमशाह नष्ट होतो. अबकी बार भाजप तडीपार, असा नारा उद्धव ठाकरे यांनी दिली.