मुंबई, ता. २४ ः ठाकरे गटाचे वांद्रे येथील माजी नगरसेवक विलास चावरी यांनी नुकताच शिंदे गटात प्रवेश केला. मुख्यमंत्री एकनाथ शिंदे यांच्या शिवसेनेत इनकमिंग सुरूच असून आतापर्यंत ३५ हून अधिक माजी नगरसेवक शिंदे गटात दाखल झाले आहेत. कोळी बांधवांचे प्रश्न सोडविण्याची ग्वाही एकनाथ शिंदे यांनी या वेळी दिली.

प्रभाग क्रमांक ९९ चे माजी नगरसेवक चावरी यांनी २०१४ मध्ये ठाकरे गटाच्या शिवसेनेकडून विधानसभा निवडणूक लढवली होती. रायगड जिल्ह्याचे ते संपर्कप्रमुखही होते. खारदांडाचे शाखाप्रमुख पदही काही वर्षे त्यांनी भूषवले होते. २००७ ते २०१२ अशी दोन टर्म ते शिवसेना ठाकरे गटाचे नगरसेवक म्हणून निवडून आले होते. चावरी यांच्या समवेत उपशहरप्रमुख विकास चव्हाण, गटप्रमुख विजय खरपुडे, अजय शिगवण आदींनीही शिवसेनेत प्रवेश केला आहे.

‘गेल्या काही वर्षांत नेतृत्वाकडून अपेक्षित मदत मिळत नव्हती. दुसरीकडे एकनाथ शिंदे यांनी सुरू केलेला कामाचा धडाका पाहून मी प्रभावित झालो,’ असे मत चावरी यांनी व्यक्त केले.
कोळी बांधवांना मासेमारी करताना अडचण येऊ नये यासाठी कोस्टल रोड बांधणी करताना दोन खांबांतील अंतर वाढवण्याचा निर्णय आम्ही घेतला. मुंबई सुशोभीकरण प्रकल्पाअंतर्गत कोळीवाड्यांचा सुनियोजित विकास करून देश-विदेशातील पर्यटकांना आकर्षित करण्यासह त्यांना उपजीविकेचे साधन उपलब्ध करून देण्याचा प्रयत्न आहे, असे मुख्यमंत्री एकनाथ शिंदे यांनी स्पष्ट केले.