मोखाडा, ता. ८ (बातमीदार) : तालुक्यात मॉन्सूनपूर्व पावसाने शुक्रवारी (ता. ७) संध्याकाळी चांगलाच धुमाकूळ घातला. वादळी- वाऱ्यासह विजेच्या कडकडाटात झालेल्या पावसात विजेचा धक्का बसून आठ जनावरांचा जागीच मृत्यू झाला, तर अनेक भागात वीजपुरवठा खंडित झाला. त्यामुळे नागरिकांना रात्र अंधारात काढावी लागली.
शुक्रवारी सायंकाळी पाच वाजल्यानंतर मोखाड्यात वादळी- वाऱ्यासह विजेच्या कडकडाटात पावसाला सुरुवात झाली. या पावसात भोवाडी येथील सकऱ्या नवश्या सुनाड यांच्या तीन बैलांसह दोन गायी, शिवराम जाना सोरे, संदीप सोन्या पाघारी आणि परशुराम महादु पढेर या शेतकऱ्यांचे प्रत्येकी एक बैल असे एकूण सहा बैल आणि दोन गायींचा जागीच मृत्यू झाला. तसेच तालुक्यातील अनेक भागांत वीजपुरवठा खंडित झाला होता.
ऐन खरीप हंगाम सुरू होत असताना, ज्यांच्यावर बळीराजाची शेती अवलंबून आहे, त्या राबत्या जनावरांचा मृत्यू झाल्याने आदिवासी शेतकरी हवालदिल झाले आहेत. त्यामुळे या शेतकऱ्यांना तातडीने नुकसानभरपाई मिळण्याची मागणी श्रमजीवी संघटनेचे मोखाडा तालुका सचिव ईश्वर बांबरे यांनी केली आहे. या घटनेची माहिती मिळताच, मोखाडा तहसीलदार मयूर खेंगले यांनी येथील तलाठी, तसेच पशुवैद्यकीय अधिकाऱ्यांना घटनास्थळी जाऊन पंचनामे करण्याचे आदेश दिले आहेत. त्यादृष्टीने संबंधित कर्मचाऱ्यांनी पंचनामे करून तहसीलदार कार्यालयाला अहवाल सादर केला आहे.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.