उल्हासनगर : एका चार वर्षीय चिमुकलीवर भटक्या कुत्र्याने हल्ला केल्यावर उल्हासनगरातील शासकीय मध्यवर्ती रुग्णालयात इमिनोग्लोबिन हे परिणामकारक इंजेक्शन नसल्याचे उघड झाले आहे.त्यामुळे या इंजेक्शनसाठी चिमुकलीला सोबत घेऊन तब्बल सात तास भटकंती करण्याची वेळ तिच्या आईवडिलांवर आली आहे.याप्रकरणाची चौकशी होणार असल्याची माहिती प्रभारी जिल्हा शल्यचिकित्सक डॉ.भावना तेलंग यांनी दिली. कॅम्प नंबर 4 मध्ये असलेल्या सुभाष टेकडी परिसरातील नालंदा शाळेजवळ सुरेश शेळके हे कुटुंबा सोबत राहतात.त्यांची 4 वर्षीय मुलगी आरोही ही आंघोळ करून घराच्या बाहेर बसली असता भटक्या कुत्र्याने तिच्यावर हल्ला करून तिच्या पायाचे लचके तोडले.ती किंचाळल्यावर तिचे आईवडील घराबाहेर आले.

त्यांनी तिला शासकीय मध्यवर्ती रुग्णालयात नेल्यावर तिला रेबिजचे इंजेक्शन देण्यात आले.काही तास बसवून ठेवण्यात आले.वय लहान आणि जखमा मोठया असल्याने तिला परिणामकारक इमिनोग्लोबिन हे इंजेक्शन देणे आवश्यक होते.मात्र ही इंजेक्शने उपलब्ध नसल्याने तिला कळवा मधील छत्रपती शिवाजी महाराज रुग्णालयात पाठवण्यात आले.सुरेश शेळके हे त्यांची मुलगी आरोही हिला लोकलने कळव्याला घेऊन गेले.पण तिथेही हे इंजेक्शन नसल्याने शेळके तिला मुंबईला घेऊन गेले.तिथे तिला इंजेक्शन देण्यात आले.

यासंदर्भात रुग्णालयाच्या प्रभारी जिल्हा शल्यचिकित्सक डॉ.भावना तेलंग यांच्याशी संपर्क साधला असता इमिनोग्लोबिन इंजेक्शने शासनाकडून पाठवण्यात येतात.ती संपण्यापूर्वीच इंजेक्शनसाठी पाठपुरावा करण्यात येतो.मुलीला रेबिजची इंजेक्शने देणारे डॉक्टर नवीन आहे.त्यांनी तिला बसवून ठेवले होते की नाही याची चौकशी करण्यात येणार असल्याचे डॉ.तेलंग यांनी सांगितले.