ठाणे : नवरात्रोत्सवादरम्यान (Navratri Festival) देवीच्या मूर्तीसमोरील दानपेटी चोरणाऱ्या अल्पवयीन मुलाला (thief arrested) अवघ्या दोन तासांत पोलिसांनी पकडले. दानपेटीतील चिल्लर घेऊन १६ वर्षीय मुलगा नोटा घेण्यासाठी गेला आणि पोलिसांच्या हाती लागला. त्याची रवानगी कासारवडवली पोलिसांनी (kasarwadi police) भिवंडीच्या बालसुधारगृहात (Bhivandi borstal) केली आहे.

कासारवडवली येथील ब्रह्मांड फेज-५ येथील नवरात्रोत्सवातील लाकडी दानपेटीच्या चोरीप्रकरणी गुन्हा दाखल केला होता. ३३०० रुपयांची नाणी दानपेटीत होती. त्यानुसार परिमंडळ पाचचे पोलिस उपायुक्त डॉ. विनयकुमार राठोड यांच्या मार्गदर्शनाखाली वरिष्ठ निरीक्षक किशोर खैरनार, निरीक्षक जयराज रणवरे यांच्या पथकाने तपासाला सुरुवात केली. दरम्यान, परिसरातील रिक्षाचालकांकडे चिल्लर देऊन नोटा घेण्यासाठी आणि भंगारवाल्याकडे लाकडी दानपेटी विकण्यासाठी एक मुलगा फिरत असल्याची माहिती पथकला मिळाली. त्यानुसार उपनिरीक्षक सचिन सरडे यांच्या पथकाने सापळा रचून १६ वर्षीय मुलाला ताब्यात घेतले. त्याच्याकडून दानपेटी व रक्कम जप्त केली.