मुंबई : अनेक वर्षांपासून प्रलंबित असलेल्या ठाणे-दिवा (Thane - Diva) पाचव्या-सहाव्या रेल्वे मार्गिकेचे (Fifth and sixth railway route) काम अंतिम टप्प्यात आले आहे. एकूण नऊ किमीची ठाणे - दिवा पाचवी-सहावी मार्गिका तयार होत आहे. आता मार्गाची चाचणी होणार असल्याने इतर महत्त्वाची कामे केली जाणार आहेत. त्यासाठी डिसेंबर महिन्यात पुढील आठवड्यात १८ तासांचा पहिला मेगाब्लॉक (Railway mega block) घेण्याची शक्यता आहे. ब्लॉकमुळे लोकल आणि लांब पल्ल्यांच्या गाड्यांवर परिणाम होण्याची शक्यता आहे. येत्या काही दिवसांत मार्गावर १८ ते ७२ तासांचा ब्लॉक घेण्यात येणार आहे.

मुंबई रेल्वे विकास कॉर्पोरेशन (एमआरव्हीसी) द्वारे मार्गिकेचे काम सुरू आहे. प्रकल्प जानेवारी २०२२ च्या मध्यावर पूर्ण करण्याचा दावा एमआरव्हीसीच्या वरिष्ठ अधिकाऱ्यांद्वारे करण्यात आला आहे. त्यासाठी १८ तासांचा ब्लॉक घेऊन दोन्ही मार्गिकेचा पाहणी दौरा केला जाणार आहे. रेल्वे सुरक्षा आयुक्त अंतिम तपासणी करतील. त्यानंतर मार्गिका खुली केली जाईल.

चाचणीसाठी लोकल चालविण्याची योजना केली गेली आहे, अशी माहिती एमआरव्हीसीच्या वरिष्ठ अधिकाऱ्यांनी दिली. ब्लॉक घेण्यासंदर्भात मध्य रेल्वे आणि एमआरव्हीसीचे अधिकारी एकमेकांच्या संपर्कात आहेत. ब्लॉकसाठी आवश्यक नियोजन सुरू असल्याचेही सांगण्यात आले.