अंमलबजावणी संचालनालयाने ईडीने नुकतेच ड्रग किंगपिन अली असगर शिराझी याच्यासह जवळच्या सहकाऱ्याचे जबाब नोंदवले आहेत.अमली पदार्थ तस्करीचे आंतरराष्ट्रीय सिंडिकेट प्रकरणात मनी लॉड्रीग आरोपाची ईडी तपास करत आहे. या प्रकरणी तळोजा कारागृहात बंद असलेला विजय राणे ऑस्ट्रेलिया, ब्रिटन आणि यूएईला कुरिअर कंपनीचा माध्यमातून अमली पदार्थांच्या तस्करीचे रॅकेट चालवत होते.

करियर कंपनीमार्फत तस्करी

मुंबई पोलिसांच्या गुन्हे शाखेने या वर्षी मार्चमध्ये अंधेरीतील कुरिअर कंपनीच्या कार्यालयावर छापा टाकला. कारवाईत 7.8 कोटी रुपये किमतीचे 15.74 किलो केटामाइन आणि 58.31 लाख रुपये किमतीच्या प्रतिबंधित औषधाच्या 23410 स्ट्रिप जप्त केल्या. विशेष पीएमएलए न्यायालयाच्या परवानगीने ईडीने 21 ते 23 डिसेंबर दरम्यान राणे यांचे जबाब नोंदवले होते.

सिंडीकेटची व्याप्ती

सिंडिकेटमधील आपली भूमिका केवळ कुरिअरच्या व्यवसायापुरतीच मर्यादित असल्याचे राणे यांनी उघड केले. या सिंडीकेटचा कैलास राजपूत हा म्होरक्या असून आरोपी शिराझीने त्याच्या सूचनेनुसार कारवाया केल्याचे निष्पन्न झाले. शिराझीने गुजरातमधून अमली पदार्थ तस्करी करून राणेंना पाठवले.राणेंच्या कंपनीने विमानतळ अधिकाऱ्यांच्या मदतीने मालाची चुकीची ओळख दर्शवत परदेशात पाठवले. सूत्रांनी दिलेल्या माहितीनुसार, राणे यांनी सिंडिकेटमध्ये महत्त्वाची भूमिका बजावणाऱ्या विमानतळाशी संबंधित अधिकाऱ्यांसह अनेक व्यक्तींची ओळख उघड केली आहे.

ईडीची कारवाई

नोव्हेंबरमध्ये, ईडीने मनी लाँड्रिंगच्या आरोपात शिराझी, कैलाश राजपूत आणि इतरांशी संबंधित असलेल्या मुंबईतील विविध ठिकाणी छापे टाकले. झडतीदरम्यान, अधिकाऱ्यांनी 5.5 लाख रुपयांची रोकड आणि 57.11 लाख रुपयांचे सोने जप्त केले.याव्यतिरिक्त, मोबाइल फोन आणि लॅपटॉपसह विविध डिजिटल उपकरणे, तसेच दोषी रेकॉर्ड जप्त करण्यात आले.