मुंबई : राज्याचे ज्येष्ठ नेते आणि राष्ट्रवादी काँग्रेसचे प्रमुख शरद पवार यांच्याबद्दल आमदार दीपक केसरकर यांनी गेल्या काही दिवसांत माध्यमांशी बोलताना शरद पवारांबद्दल अनुद्गार काढल्याची चर्चा होती. पण आपण कधीही असं वागलो नाही, पवारांचा माझ्या जडणघडणीत मोठा वाटा असल्याचं सांगत जर मी हे केलं असेल तर शरद पवारांची जाहीर दिलगीरी व्यक्त करतो, असं केसरकर यांनी म्हटलं आहे. (then I expresses public apology to Sharad Pawar says Deepak Kesarkar)

केसरकर म्हणाले, नुकत्याच झालेल्या राज्यातील राजकीय घडामोडींदरम्यान मी जेव्हा विविध मुलाखती दिल्या होत्या त्यामध्ये शरद पवारांबद्दलचा उल्लेख होता. पण पवारांबद्दल मी कधीही अनुद्गार काढलेले नाहीत. माझ्या जडणघडणीत ज्यांचा मोठा वाटा आहे, त्यापैकी एक पवार आहेत. त्यामुळं त्यांच्याबद्दल एकही अपशब्द माझ्या तोंडून येऊ शकत नाही.

शिवसेनेत जी फूट झाली त्या वस्तूस्थितीबद्दल मी उल्लेख केला होता. २०१४ मध्ये शरद पवारांनी भाजपला जाहीर पाठींबा जाहीर केला होता. त्यामुळं शिवसेनेचा तडजोडीची शक्ती कमी झाली होती. या घडलेल्या घटना आहेत, त्यामुळं या घटना आणि त्यांच्याबद्दल चुकीचं उल्लेख करण्याचा काहीही संबंध येत नाही. महाराष्ट्राचे ते ज्येष्ठ नेते आहेत प्रत्येकाला त्यांचा आदर आहे. त्यामुळं चुकून सुद्ध एखादा शब्द माझ्या तोंडून निघाला असेल तर मी शरद पवार यांची जाहीर दिलगिरी व्यक्त करतो. इतरांबद्दल मला काहीही म्हणायचं नाही, असंही केसरकर यांनी म्हटलं आहे.

जितेंद्र आव्हाड हे मला हेलिकॉप्टरनं भेटायला आले होते. पण ते शरद पवारांचा निरोप घेऊन आले नव्हते. तर नारायण राणेंच्या मुलाचा प्रचार करा असं सांगायला ते आले होते. पण पवार जेव्हा सावंतवाडीला आले होते तेव्हा मी माझ्या मतदारसंघात आले तेव्हा मी माझा राजीनामा त्यांच्याकडे सोपवला होता. त्यांना नम्रपणे मी सांगितलं होतं की, मी राणेंचा प्रचार करु शकत नाही, असंही स्पष्टीकरण केसरकर यांनी आव्हाडांबाबत दिलं आहे.