लोणावळा, ता. २० : महाराष्ट्र राज्य रस्ते विकास महामंडळ व आयआरबीच्या हलगर्जीपणामुळे मुंबई-पुणे राष्ट्रीय महामार्गावर वलवण ते खंडाळा दरम्यान वारंवार अपघात होतात. त्यामुळे अनेक निष्पाप नागरिकांचा बळी जात आहे.
अपघात रोखण्यासाठी तातडीच्या उपाययोजना कराव्यात या मागणीसाठी लोणावळा जागरूक नागरिकच्या वतीने रविवारी तासभर महामार्ग रोखून आंदोलन करण्यात आले.
यावेळी कुमार रिसॉर्टसमोरील आंदोलनात सर्वपक्षीय पुढाऱ्यांसह, सामाजिक संघटना, नागरिक मोठ्या संख्येने रस्त्यावर उतरले. यावेळी निषेधाच्या जोरदार घोषणा देण्यात आल्या.
पुणे-मुंबई राष्ट्रीय महामार्गावर लोणावळा परिसरात अपघाताचे प्रमाण वाढत आहे. वलवण ते खंडाळा परिसरातील विद्यार्थी, युवक, महिला बंधू भगिनींना आपला जीव धोक्यात घालून या मार्गावरून प्रवास करावा लागतो. लोणावळेकरांना या समस्येला सतत सामोरे जावे लागते. पंधरा दिवसांत महामार्गावर अपघातात दोन युवकांचा बळी गेला होता. तर अन्य एका अपघातात महिला गंभीर जखमी झाली होती. यापार्श्वभूमीवर मनःशक्ती ते खंडाळा रोडवर रस्ता दुभाजक व पथ दिव्यांची सोय करावी, अपघात स्थळांवर गतिरोधक बसवावेत, मनःशक्ती ते किरण पेट्रोल पंपादरम्यान रस्ता रुंदीकरण व्हावे, खंडाळा पोलिस प्रशिक्षण केंद्र ते नाझर कॉर्नर रस्ता सरळ करावा, वाहनांना लोणावळा व खंडाळ्यात प्रवेश बंदी करावी, खोपोली वरून राजमाची खंडाळा जुन्या रोड मार्गे येणारी अवजड वाहने बंद करावी, आदी मागण्या लोणावळा जागरूक नागरिकाच्या वतीने करण्यात आल्या.
रस्ते विकास महामंडळाचे कार्यकारी अभियंता राकेश सोनवणे, तहसीलदार मधुसूदन बर्गे यांनी आंदोलनस्थळी भेट देत, लेखी हमी दिल्यानंतर आंदोलन मागे घेण्यात आले.