सकाळ वृत्तसेवा
मुंबई, ता. २ : वाढती उष्णता, हवेचा मंदावलेला प्रवाह त्यात हवेत पसरलेली धूळ यामुळे मुंबईतील हवेचा दर्जा पुन्हा एकदा घसरला असून हवा गुणवत्ता निर्देशांक २९७ असा ‘वाईट’ नोंदवला गेला. केवळ वरळी परिसरात हवेचा दर्जा उत्तम असून बाकी ठिकाणी प्रदूषणात पुन्हा वाढ झाल्याचे दिसले.

शहरात हवा गुणवत्ता निर्देशांक २९७ सह वाईट नोंदवला गेला आहे. मालाडमध्ये ३५३, माझगाव परिसरात ३२९, अंधेरीत ३१५, चेंबूर ३०९, भांडुप ३०३ हवा गुणवत्ता निर्देशांकासह हवेचा दर्जा अतिशय वाईट नोंदवला गेला; तर बिकेसी २९३, कुलाबा २६२, बोरिवली २१९ हवा गुणवत्ता निर्देशांकासह हवेचा दर्जा वाईट नोंदवला गेला. नवी मुंबई आणि वरळी प्रदूषणाची पातळी कमी आहे. नवी मुंबई १५९ सह मध्यम; तर वरळीमध्ये ९३ हवा गुणवत्ता निर्देशांकासह हवेचा दर्जा उत्तम नोंदवला गेला.

सध्या उष्णता वाढली आहे. हवेचा वेगही मंदावला आहे. शिवाय हवेत पसरलेल्या धुळीमुळे हवेचा दर्जा घसरला आहे. असे असले, तरी त्याचा मोठा परिणाम जाणवणार नाही. हवेचा दर्जा दोन दिवसांत सुधारेल.
- गुफरान बेग, प्रकल्प संचालक, सफर