खारघर : गेल्‍या १५ दिवसांपासून खारघर सेक्टर १२ मध्ये दूषित पाणीपुरवठा (contaminated water supply) होत आहे. त्‍यामुळे उलटी, जुलाब आणि पोटदुखीचे आजार बळावले असून अनेक रुग्‍णांवर खासगी दवाखान्यात उपचार सुरू आहेत. याबाबत तक्रार करूनही सिडकोकडून (cidco) दुर्लक्ष करण्यात येत असल्‍याचे नागरिकांचे म्‍हणणे आहे. खारघर सेक्टर १३ मधील सिडकोच्या बीयूडीपी वसाहतीत गेल्या काही दिवसांपासून दुर्गंधीयुक्त, दूषित पाणी पुरवठा होत असल्यामुळे उलटी, जुलाब आणि पोटदुखीचे रुग्ण (patients increases) वाढले आहेत. घरोघरी रुग्ण आढळत आहेत.

सिडकोकडून विविध कामांसाठी खोदकाम करण्यात आले आहे. याच ठिकाणाहून मलनिस्‍सारण वाहिनी जात असल्‍याने गळतीमुळे दूषित पाणीपुरवठा होण्याची शक्‍यता वर्तवली जात आहे. याबाबत पाच दिवसांत उपाययोजना न केल्‍यास सिडको कार्यालयासमोर उपोषण करणार असल्‍याचे पत्र सामाजिक कार्यकर्ते दीपक शिंदे यांनी दिले आहे. याबाबत परिसरातील डॉक्‍टरांकडे विचारणा केली असता, दूषित पाणी अथवा उघड्यावरील खाद्य पदार्थाच्या सेवनामुळे उलटी, जुलाब आणि पोटदुखीचे आजार होऊ शकतात. मात्र उपचारासाठी येणारे रुग्ण हे सेक्टर बारामधील असून हा प्रकार गेल्या पंधरा दिवसांपासून सुरू असल्‍याचे त्‍यांनी सांगितले.

दूषित पाणीपुरवठा होत असल्याचे स्थानिक नगरसेवक रामजी बेरा यांच्या निदर्शनास येताच त्यांनी २० जानेवारी रोजी खारघरमधील सिडकोच्या पाणीपुरवठा विभागाचे अधिकारी चेतन देवरे यांची भेट घेऊन दूषित आणि दुर्गंधीयुक्‍त पाणी पुरवठ्याबाबत पुराव्यासह तक्रार केली. तसेच जलवाहिनीतील तांत्रिक दोष दूर करण्याबाबत निवेदन दिले.

ज्या सोसायटीत दूषित पाणीपुरवठा होत आहे, त्या सोसायटीमध्ये सिडकोकडून टँकरने पाणीपुरवठा केला जात आहे. तसेच जलवाहिनीला कुठे गळती लागली आहे, याचाही शोध घेण्याचे काम सुरू आहे. लवकरच ही समस्या दूर केली जाईल.

- नाणिक चौटानी, कार्यकारी अभियंता, पाणीपुरवठा विभाग, सिडको.

खारघर सेक्टर १२ मध्ये पंधरा दिवसांपासून उलटी, जुलाब आणि पोटदुखीचे रुग्ण उपचारासाठी रुग्णालयात येत आहेत. दूषित पाणी पुरवठ्यामुळे रुग्‍ण वाढण्याची शक्‍यता आहे.

- डॉ. उदय टाळणीकर, सेक्टर- १२.

परिसरात होत असलेल्या पाण्याला दुर्गंधी येते. दूषित पाणीपुरवठा होत असल्यामुळे परिसरात उलटी, जुलाबाचे रुग्ण वाढले आहेत. वडिलांना रात्री उलटी-जुलाबाचा त्रास होत असल्यामुळे खासगी रुग्णालयात दाखल करावे लागले. याबाबत सिडकोकडे तक्रार केल्‍यास काम सुरू असल्‍याचे सांगण्यात येते.

- रूपेश चव्हाण, रहिवासी, श्वेतगंगा सोसायटी, सेक्टर- १२.