भाईंदर : भाईंदरच्या (Bhayandar) पुढे राई, मोर्वा गावापर्यंत विस्तारलेला मेट्रो मार्ग आणि त्यासाठी उभारण्यात येणाऱ्या कारशेडविरोधात (Metro carshed) ग्रामस्थांकडून आतापर्यंत एक हजाराहून अधिक हरकती नोंदवण्यात (Objection) आल्या आहेत. शिवाय उद्या (सोमवार) देखील आणखी हरकती दाखल करण्यात येणार आहेत. दरम्यान, मेट्रोविरोधातील (Metro) संघर्ष आणखी तीव्र करण्यासाठी एका जाहीर सभेचे आयोजनही करण्यात आले आहे.

भाईंदरपर्यंत येणाऱ्या मेट्रोचा पुढे राई, मोर्वा गावापर्यंत विस्तार करण्यात येणार आहे. मेट्रो मार्गामुळे ग्रामस्थांची घरे तोडावी लागणार आहेत, शिवाय कारशेडसाठी ग्रामस्थांच्या जमिनीदेखील संपादित कराव्या लागणार आहेत. मात्र पिढ्यान्‌ पिढ्यांची घरे तोडण्यास तसेच उपजीविका अवलंबून असलेल्या शेतजमिनी मेट्रो कारशेडसाठी देण्यास ग्रामस्थांनी ठाम नकार दिला आहे. या मुद्द्यावर ग्रामस्थांविरुद्ध मेट्रो, असा संघर्ष सुरू झाला आहे. दरम्यान, कारशेडसाठीच्या जमीन संपादनप्रकरणी जाहीर करण्यात आलेल्या अधिसूचनेवर स्थानिक पातळीवर एक हजाराहून अधिक हरकती दाखल झाल्या आहेत. १९ फेब्रुवारी ही हरकती आणि सूचना दाखल करण्याची शेवटची मुदत होती, मात्र सुटीचा दिवस असल्याने ग्रामस्थांकडून सोमवारीही हरकती दाखल केल्या जाणार आहेत.

आतापर्यंत ६००च्या आसपास हरकती प्रत्यक्ष दाखल करण्यात आल्या आहेत, तर पावणे तीनशेहून अधिक हरकती ऑनलाईन नोंदवण्यात आल्या आहेत. याशिवाय अनेकांनी आपापल्या वकिलांमार्फतही हरकती दाखल केल्या आहेत, तर काहींनी थेट मुख्यमंत्री उद्धव ठाकरे यांच्याकडेच तक्रारी केल्या आहेत. सोमवारी देखील शेकडो हरकती दाखल केल्या जाणार आहेत, अशी माहिती ग्रामस्थ अशोक पाटील यांनी दिली.

न्यायालयात जाण्याची तयारी...
मेट्रोविरोधात येत्या बुधवारी २३ फेब्रुवारीला राई येथील आदर्श विद्यामंदिर शाळेच्या पटांगणात सायंकाळी जाहीर सभेचे आयोजन करण्यात आले आहे. या सभेला अनुभवी वकील, तज्ज्ञ, सामाजिक संस्थांचे प्रतिनिधी मार्गदर्शन करणार आहेत. त्यामुळे मेट्रोविरोधात आता ग्रामस्थ आणखी आक्रमक झाले असून वेळ पडल्यास न्यायालयात जाण्याची तयारी देखील सुरू करण्यात आली आहे.