कासा, ता. २३ (बातमीदार) ः जवळजवळ महिनाभरापूर्वी निकाल लागलेल्या तलासरी नगरपंचायतीच्या नगराध्यक्षपदासाठी आज निवडणूक पार पडली. त्रिशंकू अवस्थेत असलेल्या या नगरपंचायतीमध्ये भाजपने माकपच्या उमेदवाराला मतदान केल्याने नगरपंचायतीवर पुन्हा लालबावटा फडकला. नगराध्यक्षपदासाठी माकपचे सुरेश भोये निवडून आले, तर उपनगराध्यक्षपदी माकपचे सुभाष दुमाडा यांची बिनविरोध निवड झाली आहे.

तलासरी नगरपंचायत नगराध्यक्ष पदासाठी झालेल्या निवडणुकीत शिवसेनेकडून आशीर्वाद रिंजड तसेच माकपकडून सुरेश भोये यांनी अर्ज दाखल केले होते. नगराध्यक्ष पदासाठी सुरेश भोये यांना माकपची सहा आणि भाजपची सहा अशी एकूण १२ मते पडली, तर आशीर्वाद रिंजड यांना पाच मते मिळाली. त्यामुळे सुरेश भोये यांचा एकतर्फी विजय झाला.
या वेळी माकपचे आमदार विनोद निकोले, सभापती नंदू हाडळ, लक्ष्मणा डोंभरे, उपसभापती राजेश खरपडे, अनिल झिरवा, बीजेपी तालुकाध्यक्ष विनोद मेढा, सुरेंद्र निकुंभ, भानू भोये आणि कार्यकर्ते मोठ्या संख्येने उपस्थित होते.

तलासरी नगरपंचायत पक्षीय बलाबल
एकूण जागा - १७
माकप - ६
भाजप - ६
शिवसेना - ३
तलासरी
विकास पॅनेल - २