तुर्भे : गावागावांत पालिका निवडणुकीची (Municipal corporation election) रणधुमाळी शिगेला पोहोचली आहे. अद्याप निवडणुकीची तारीख जाहीर झाली नसली, तरी इच्छुक उमेदवार आणि माजी नगरसेवकांनी (Former corporators) आपापल्या प्रभागात विविध कार्यक्रमांसह मेळावे, हळदी-कुंकू समारंभाचा (Haldi-kukkum event) धडाका लावला आहे. जाहीर प्रचार सुरू झाला नसला, तरी वैयक्तिक गाठीभेटी सुरूच आहेत. यंदाच्या निवडणुका पॅनल पद्धतीने होणार असल्याने एका प्रभागात स्वतः, तर दुसऱ्या प्रभागातून बायकोला निवडणुकीच्या रिंगणात (husband-wife election candidates) उतरवण्यासाठी इच्छुकांची जोरदार मोर्चेबांधणी सुरू झाली आहे.

नवी मुंबई महापालिकेच्या पार्श्वभूमीवर गाव-गावठाण, झोपड्या व विभाग ढवळून निघाले आहेत. भाऊबंदकी उफाळून आले आहेत. आरोप-प्रत्यारोपांच्या फैरी झडत आहेत. सत्तास्पर्धा तीव्र झाली आहे. प्रचारासाठी यंदा वेगवेगळे तंत्र वापरले जात आहेत. त्यात समाज माध्यमांचा वापर अधिक वाढलाय. इच्छुक उमेदवार व माजी नगरसेवकांनी तर आपापल्या प्रभागातील मतदारांचा वेगळा व्हॉट्सॲप ग्रुप बनवला आहे. शुभ सकाळ, शुभ रात्री आणि आपल्या कामाचा व प्रभागात होणाऱ्या कार्यक्रमाचा व्हिडीओ टाकून मतदारांवर आपली छाप पाडण्याचे काम सध्या जोमात सुरू आहे.

तसेच अनेकांनी मतदारांना खूश करण्यासाठी त्‍यांचे वाढदिवसही आपल्या कार्यालयात साजरे करत आहेत. अनेकांच्या कार्यालयात आतापासूनच मेजवाण्या सुरू झाल्या आहेत. त्यात प्रभागातील मतदारांना खूश करण्यासाठी बॅनरवर त्यांचे फोटो छापले जात आहेत.
उमेदवारापेक्षा कार्यकर्ताच जास्त व्यस्त झाला आहे. त्यात बहुतांश उमेदवारांनी मोबाईलवरील मेसेजचे पॅकेज खरेदी केले आहे. एकाच वेळी मतदारांना हे लिखित संदेश आणि व्हाईस कॉल पाठवले जातात. प्रभागातील कामांचे आणि कार्यक्रमाचे ऑडिओ व व्हिडिओ सीडीही बनवून घेण्यात आल्या आहेत. शाळा, महाविद्यालये बंद असल्याने तरुणाई हे काम कमी-जास्त पैशांत करतात. सध्या पक्षांतराचे वादळच सुरू आहे. शेकडो कार्यकर्ते घेऊन पक्षात प्रवेश करणाऱ्यांची संख्या वाढत आहे.

कोरोनाचा विसर, निवडणुकीचा फिव्हर

निवडणुकांचे वारे वाहू लागल्याने कोरोनाच्या चर्चांना सध्या पूर्णविराम मिळाला आहे. कोरोनामुक्त शहर झाल्याचे चित्र एकंदरीत नवी मुंबईत राजकारण्यांनी तयार केले आहे. गेल्या वर्षी फक्त कोरोना एके कोरोनावरच चर्चा रंगली जात होती; मात्र आता कोरोनाचा विसर पडल्याने जो तो फक्त पालिकेच्या निवडणुकीबाबतच चर्चा करत आहेत. बघावं तिथे फक्त एकच चर्चा ती म्हणजे निवडणूक.

डीपीचा तगादा

काही उमेदवारांनी त्यांच्या समर्थकांना मोबाईलवर आपला डीपी ठेवायला सांगितले आहे. एखाद्याने आपला डीपी ठेवला असेल, तर तो आपला पक्का समर्थक आहे, हे उमेदवार ओळखतो. कुणीकुणी डीपी ठेवला आहे, हे आवर्जून तपासतात.

सामाजिक कार्यकर्तेच रिंगणात

सध्या प्रभागाचा उमेदवार कोण असेल याकडे सगळ्यांचे लक्ष लागले आहे. स्वतःला सामाजिक कार्यकर्ते म्हणून घेणारेच निवडणुकीच्या रिंगणात उतरले आहेत. त्यांच्या जनसंपर्क कार्यालयांचे उद्‍घाटन जोरात सुरू झाले आहे.

गाण्यांवर भर

अनेक उमेदवारांनी ऑडिओ व व्हिडीओ सीडी तयार करताना गाण्यांचा वापर केला आहे. त्यात ‘तुफान आलंया’, ‘दे धक्का’, ‘जय हो, विजयी भव:’ या गाण्यांची मोठी चलती आहे.