नवी मुंबई : काही मिनिटांत दुप्पट नोटा देण्याच्या बहाण्याने एका व्यक्तीने पुण्यातील व्यावसायिकाला (Businessman) लुबाडल्याचे समोर आले होते. या व्यक्तीला २० लाख रुपयांच्या बदल्यात बनावट नोटा (fake notes) देऊन फसवणूक केली. याप्रकरणी कोपरखैरणे पोलिसांनी (koparkhairane police) फसवणुकीचा गुन्हा दाखल केला आहे. पुण्यातील मंचर भागात राहणारे सीताराम शिंदे (वय ४४) यांचा शालेय साहित्य विक्रीचा व्यवसाय आहे.

त्यांचा भाचा गणेश लांडे मुंबईत राहण्यास असून काही महिन्यांपूर्वी या टोळीने नोटा दुप्पट करून देण्याच्या बहाण्याने संपर्क साधला होता. त्याला ३० लाख रुपयांच्या नोटा दिल्यास दुप्पट पैसे मिळतील, असे प्रलोभन दाखवले होते; मात्र गणेशकडे पैसे नसल्याने त्याने आपले मामा शिंदे यांना माहिती दिली. सुरुवातीला त्यांनी दुर्लक्ष केले; मात्र त्यानंतर त्याने वारंवार फोनवरून संपर्क साधून वाशीमध्ये येत खात्री करण्यास सांगितले.

२७ फेब्रुवारीला शिंदे आपल्या मुलासह वाशीमध्ये आल्यानंतर गणेशसोबत आलेल्या व्यक्तीने त्यांना पाच हजार रुपयांच्या मोबदल्यात १० हजार रुपये दिले. यानंतर त्यांनी मित्र, नातेवाईक व दागिने गहाण ठेवून २० लाख रुपये जमा केले. मंगळवारी (ता. १) शिंदे पैसे दुप्पट करण्यासाठी नवी मुंबईतील कोपरखैरणेत आले.

गणेश याच्यासह त्यांनी सदर व्यक्तीची वरिष्ठ चौकात भेट घेतली. या ठिकाणी त्या व्यक्तीने कारमध्ये २० लाख रुपयांच्या नोटा मोजल्या आणि त्यानंतर ही रक्कम हिरव्या रंगाच्या बॅगेत ठेवत कुलूप लावून आपल्या सुटकेसमध्ये ठेवली आणि ४० लाख रुपये आणून देण्याचा बहाणा केला; मात्र शिंदे यांनी त्याला रोखले. सदर व्यक्तीने त्यांची रक्कम परत देण्याचा बहाणा करत हिरव्या रंगाची बॅग शिंदे यांना दिली आणि दुप्पट पैसे घेऊन येण्याच्या बहाण्याने पलायन केले; मात्र शिंदे यांना बॅगेबाबत संशय आल्याने त्यांनी कुलूप तोडून बॅगेत तपासणी केली असता बनावट नोटा आढळून आल्या. अखेर त्यांनी कोपरखैरणे पोलिस ठाण्यात तक्रार दाखल केली.