सकाळ वृत्तसेवा

डोंबिवली, ता. ३० : उन्हाचा पारा हा ४० अंशांच्या पार गेल्याने घरोघरी एसी, कूलर लावण्याची, तसेच त्यांची सर्व्हिसिंग करून घेण्याकडे नागरिकांचा कल वाढला आहे. मार्च महिन्यात अचानक तापमानात वाढ झाल्याने या दिवसांतच एसी सर्व्हिसिंगला सुगीचे दिवस आले आहेत. गेली दोन वर्षे कोरोनामुळे एसी सर्व्हिसिंगचा व्यवसाय बंद होता; परंतु कोरोनाची लाट ओसरल्यानंतर कर्मचाऱ्यांच्या हाताला पुन्हा काम मिळाल्याने समाधान व्यक्त होत आहे.
घरात एसी लावल्यानंतर त्या कंपनीकडून वर्षभरात तीन सर्व्हिस मोफत दिल्या जातात. त्यानंतर मात्र ठराविक रक्कम आकारली जाते. त्यामुळे ग्राहक हार्डवेअर दुकानांची धाव घेतात. येथील स्वस्तातील कारागीर शोधून एसी वा कुलरची दुरुस्ती होते. अगदी ४०० रुपयांपासून ते जास्तीत जास्त ८०० रुपयांपर्यंत दर त्यासाठी आकारले जातात. दरम्यान, डोंबिवलीतील महादेव हार्डवेअरचे कर्मचारी सांगतात, एसी सर्व्हिसिंगला या महिन्यापासून मागणी वाढली आहे. त्यासाठी ६५० रुपये दर आम्ही आकारतो, जे मागच्यावर्षीप्रमाणेच आहेत.

कोरोनामुळे दोन वर्षे व्यवसाय ठप्प होता. एक दोन ग्राहक अगदीच पर्याय नसल्याने काम द्यायचे. या वर्षी परिस्थिती वेगळी आहे. मार्च महिन्यापासून आमच्याकडे दिवसाला १५-२० जणांची कामे सहज येत आहेत. त्यानुसार कारागिर बोलावून आम्ही काम करून घेतो. ग्राहकांची आर्थिक परिस्थिती कोरोनामुळे फारशी चांगली नसल्याने सर्व्हिसिंग दरामध्ये आम्ही कोणतीही वाढ केलेली नाही.
- राजेश नायर, डोंबिवली.

कोरोनानंतर आता कुठे आमच्या हाताला काम मिळू लागले आहे. अजूनही अनेक जण एसी-कुलर दुरुस्तीसाठी घरी बोलावण्यास टाळाटाळ करतात. तरीही ग्राहकांचा प्रतिसाद मिळतोय. आपल्याकडील ग्राहक जाऊ नये म्हणून सर्विसिंगचे दर कमी केले आहेत. या वर्षी आर्थिक फटका बसला तरी हरकत नाही, ग्राहक जोडलेला राहील.
- दीपक गावडे, डोंबिवली.