तालुक्यात दुपारपर्यंत मतदान केंद्रांवर तुरळक गर्दी
आदिवासी वाड्यापाड्यात, गाव-खेड्यात शिस्तीचे दर्शन
पाली, ता. २० (वार्ताहर) ः पालीसह सुधागड तालुक्यामध्ये विधानसभा निवडणुकीच्‍या पार्श्वभूमीवर सकाळपासून मतदान केंद्रांवर मतदारांची तुरळक गर्दी होती. दुपारी एक वाजेपर्यंत मतदान ३० टक्‍क्‍यांपर्यंत पोहोचले होते, तर आदिवासी वाड्या-पाड्यात व गाव- खेड्यातील मतदारांनी शिस्तीचे पालन केले.
पालीतील ग. बा. वडेर हायस्कूल व जिल्हा परिषद शाळा या मतदान केंद्रावर ज्येष्ठांसह नवमतदारांनी मतदानाचा हक्क बजावला. काही ज्येष्ठ नागरिक हे चारचाकी वाहनांनी मतदान केंद्रावर पोहोचून मतदानाचा हक्क बजावला. पालीतील ग. बा. वडेर हायस्कूल हे मतदान केंद्र गैरसोयीचे ठरल्याचे मतदारांकडून सांगण्यात आले. येथे पोहोचण्यासाठी मतदारांना मोठी चढण चढून जावे लागत होते. शिवाय मतदान केंद्राच्या बाहेर दगड व खाचखळगे असल्याने ज्‍येष्ठांना चालताना अडचण येत असल्याने अनेकांची गैरसोय होत होती. तालुक्यात मतदानावेळी कुठेही अनुचित प्रकार घडला नाही. सर्वत्र शांतता व सुव्यवस्थेत मतदान पार पडले. आदिवासी पाडे व गाव-खेड्यात मतदारांमध्ये शिस्त पाहायला मिळाली. छोट्या गावांमध्येदेखील मतदार अतिशय शिस्तीमध्ये येऊन रांगेनुसार मतदान करत होते. शिवाय मतदान करतेवेळी अतिशय शांततादेखील होती. तालुक्यातील भावशेत गावातील मतदान केंद्रावर गावासह आजूबाजूच्या ठाकुरवाडी व कातकरवाडी येथील मतदारांनी सकाळपासून शिस्तीचे पालन करत मतदान केले. अशीच परिस्थिती इतरही गाव-खेड्यात व आदिवासी पाड्यांमध्ये पाहायला मिळाली.
.....................
सेल्फी पॉइंटवर गर्दी
पालीतील ग. बा. वडेर हायस्कूल मतदान केंद्रावर सेल्फी पॉइंट लावण्यात आला होता. या ठिकाणी अनेक मतदारांनी मतदान करून आल्यावर शाई लावलेले बोट दाखवत सेल्फी घेतला. अनेकांनी आपल्या कुटुंबासमवेत, तसेच आपल्या जोडीदारा समवेत सेल्फी घेतला.
.............................