सकाळ वृत्तसेवा

मुंबई, ता. ९ : ‘रामायण, महाभारत आपल्या गर्वाचा विषय आहे. राम आणि सीता फक्त हिंदूंचे नाहीत. राम, सीता यांना फक्त हिंदू धर्माचे देव मी मानत नाही. माझ्यासारख्याचे नास्तिक आहेत, ते सुद्धा त्यांना मानतात. हा आस्थेचा विषय आहे, जेव्हा आपण मर्यादा पुरुषोत्तम यांची गोष्ट करतो तेव्हा राम आणि सीता हेच आहेत. रामायणामध्ये राम आणि त्यांचे भावंड हे नातेही अद्‍भुत आहे. रामाला जो वेगळं करेल तो रावण, असे मत ज्येष्ठ गीतकार जावेद अख्तर यांनी व्यक्त केले.

मुंबईत दिवाळीला धूमधडाक्यात सुरुवात झाली आहे. त्यानिमित्त दादर येथील शिवाज पार्क येथे महाराष्ट्र नवनिर्माण सेनेचा ‘दीपोत्सव २०२३’ पार पडला. या वेळी मनसे अध्यक्ष राज ठाकरे यांच्यासह ज्येष्ठ लेखक सलीम खान, आशुतोष गोवारीकर, अभिनेता रितेश देशमुख , पुष्कर श्रोत्री तसेच अनेक सेलिब्रिटींनी हजेरी लावली होती. या वेळी अभिनेता रितेश देशमुख यांनी सलीम आणि जावेद अख्तर यांची मुलाखत घेतली. त्यावेळेस जावेद अख्तर यांनी आताच्या पिढीला तात्काळ प्रगती करायची असल्याचे सांगितले. रितेशने सुपरस्टार कोण, असा प्रश्न विचारला तेव्हा दिलीपकुमारनंतर अमिताभ बच्चन यांनी वर्षानुवर्षे मेहनत घेऊन इथपर्यंत पोहोचल्याचे सांगितले; तर आता उदयाला येणाऱ्या प्रत्येक अभिनेत्याला सर्व शिकण्याची गरज आहे, असा सल्लाही सलीम यांनी दिला.

......