नवी दिल्ली, ता. १५ : वनसंपदा, खनिज संपदा व कला यांनी समृद्ध असलेले झारखंड राज्य ईश्वराची सुंदर निर्मिती आहे. या राज्यातील जमिनीच्या उदरात काही ना काही संपदा दडलेली आहे. वृक्ष व निसर्गाची पूजा करणारे आदिवासी लोक या राज्यात आहेत. निसर्ग रक्षणाला धर्माचे अधिष्ठान दिल्यामुळे लोकांनी निसर्ग संपदेचे रक्षण केले आहे, असे प्रतिपादन महाराष्ट्राचे राज्यपाल रमेश बैस यांनी आज येथे केले. राज्यपाल बैस यांच्या प्रमुख उपस्थितीत बुधवारी (ता. १५) महाराष्ट्र राजभवन येथे प्रथमच ‘झारखंड राज्य स्थापना दिवस’ साजरा करण्यात आला, यावेळी ते बोलत होते.

‘एक भारत श्रेष्ठ भारत’ उपक्रमांतर्गत विविध राज्य व केंद्रशासित प्रदेशांचे स्थापना दिवस देशातील सर्व राजभवनांमध्ये साजरे करण्याच्या सूचनेनुसार झारखंड राज्य स्थापना दिवस महाराष्ट्र राजभवन येथे साजरा करण्यात आला. झारखंडचे सुपुत्र महान क्रांतिकारक बिरसा मुंडा यांना जयंतीदिनानिमित्त अभिवादन करून राज्यपालांनी झारखंड राज्याच्या निर्मितीसाठी प्रत्यक्ष व अप्रत्यक्ष योगदान देणाऱ्या सर्वांचे कृतज्ञतापूर्वक स्मरण केले. भारत देश विविध रंगांनी सजलेल्या सुंदर पुष्पगुच्छाप्रमाणे असून झारखंडसारख्या राज्यांमुळे तो अधिक शोभायमान दिसतो, असे राज्यपालांनी यावेळी सांगितले. झारखंडला ऐतिहासिक पार्श्वभूमी लाभली असून राज्य कला, चित्रकला व नृत्य या क्षेत्रात समृद्ध असल्याचे राज्यपालांनी सांगितले. झारखंड राज्याचे दोन वर्षे राज्यपाल म्हणून काम करणे आपल्यासाठी अभिमानास्पद असल्याचे त्यांनी सांगितले.

झारखंड सरकारचे सांस्कृतिक कार्य संचालनालय, जय फाऊंडेशन व रुद्र प्रतिष्ठान संस्थांच्या माध्यमातून झारखंडच्या लोकसंस्कृतीचे दर्शन घडविणारा सांस्कृतिक कार्यक्रम या वेळी सादर करण्यात आला. राज्यपाल बैस यांच्या हस्ते जय व रुद्र प्रतिष्ठानचे अध्यक्ष धनंजय सिंह, खासदार संजीव नाईक, झारखंड येथील कलाकार सृष्टीधर महतो व लखन गुरिया, लालमती सिंह, सीमा सिंह तसेच इतर कलाकारांचा सत्कार करण्यात आला. कार्यक्रमात झारखंडचे राज्यपाल सी. पी. राधाकृष्णन यांचा झारखंड स्थापना दिनानिमित्त संदेश दाखविण्यात आला. झारखंड राज्याची माहिती दाखविणारा लघुपटदेखील यावेळी दाखविण्यात आला.