अखेरच्या रविवारी ईशान्य मुंबईत प्रचाराचा धुरळा
मिहीर कोटेचा आणि संजय दिना पाटील यांचा लोकांशी थेट संवाद
सकाळ वृत्तसेवा
मुंबई, ता. १२ : मतदानापूर्वी अखेरचा रविवार लक्षात घेत सर्वच उमेदवारांनी ईशान्य मुंबईत प्रचाराचा धुरळा उडवला. महायुतीचे उमेदवार आमदार मिहीर कोटेचा यांनी घाटकोपर पूर्व भागात रॅली काढत शक्तिप्रदर्शन केले. त्याचवेळी महायुतीच्या कार्यकर्ते, पदाधिकाऱ्यांनी रविवारच्या सुटीचा योग्य वापर करत आपापल्या विभागात पदयात्रा, चौकसभा, बैठका घेत थेट मतदारांसोबत संवाद साधला. दुसरीकडे महाविकास आघाडीचे उमेदवार संजय दिना पाटील यांनी मॉर्निंग वॉकने आपल्या प्रचाराची सुरुवात करत जास्तीत जास्त लोकांशी थेट संवाद साधण्याचा प्रयत्न केला.
मिहीर कोटेचा यांनी विद्याविहार येथील सोमय्या महाविद्यालय संकुलाशेजारील नीलकंठ व्हॅली सोसायटीतून रविवारी सकाळी प्रचारास सुरुवात केली. नीलकंठ व्हॅली सोसायटीतील जनसंपर्क अभियान आटोपल्यानंतर ते गरोडिया नगर येथील सती कृपा शॉपिंग सेंटर येथे आयोजित मेगा रॅलीत दाखल झाले. तेथे मोठ्या संख्येने भाजपचे माजी खासदार, आमदार, कार्यकर्ते, पदाधिकारी उपस्थित होते. त्या सोबतच शिवसेना, मनसे, राष्ट्रवादी काँग्रेस, रिपाइं आणि अन्य घटक पक्षांचे प्रमुख कार्यकर्ते, पदाधिकारी यांनी मोठ्या संख्येने या रॅलीत सहभाग घेतला. गरोडिया नगर, ९० फीट रोड, विक्रांत सर्कल, आर. बी. मेहता मार्ग, भानुशाली लेन, भाटिया वाडी, टिळक रोड, सिंधू बाग, भवेश्वर लेन, एम. जी. रोड या मार्गावरून ही मेगा रॅली मार्गस्थ झाली आणि राम मंदिर येथे समाप्त झाली; तर सायंकाळच्या सत्रात विक्रोळी येथे उपमुख्यमंत्री देवेंद्र फडणवीस यांची जाहीर सभा झाली.
संजय दिना पाटील यांचा मॉर्निंग वॉक...
महायुतीचे ईशान्य मुंबई मतदारसंघातील उमेदवार संजय दिना पाटील यांनी रविवारी (ता. १२) मॉर्निंग वॉक करत लोकांशी संवाद साधला. त्यांनी भांडुप-पश्चिम विधानसभामध्ये आपला मोर्चा वळवला होता. सकाळी मॉर्निंग वॉकच्या निमित्ताने आपल्या कार्यकर्त्यांसह भांडुप पश्चिम मतदारसंघ पिंजून काढला. दुपारी त्यांनी आपल्या कार्यकर्ते, तसेच काही सोसायट्यांच्या पदाधिकाऱ्यांच्या बैठका घेतल्या; तर सायंकाळी त्यांच्या प्रचारासाठी शिवसेना ठाकरे गटाचे नेते आदित्य ठाकरे यांची सभा झाली.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.