पीपल्स एज्युकेशन सोसायटीचा वर्धापनदिन
सकाळ वृत्तसेवा
मुंबई, ता. ९ : भारतरत्न डॉ. बाबासाहेब आंबेडकर यांनी ८ जुलै १९४५ रोजी स्थापन केलेल्‍या पीपल्स एज्युकेशन सोसायटीचा ७९ वा वर्धापनदिन मोठ्या उत्साहात पार पडला. आनंदराज आंबेडकर यांनी आपल्या अध्यक्षीय भाषणात गेल्या दोन वर्षांत आतापर्यंत विविध महाविद्यालयांमध्ये यशस्वीपणे केलेल्या कामांचा आढावा घेतला. त्यांनी सर्व कर्मचाऱ्यांना मार्गदर्शन करताना संस्थेच्या विकासासाठी सकारात्मक दिशेने त्यांच्या क्षमतांचा उपयोग करावा, असे आवाहन केले. जागतिक दर्जाचे महाविद्यालय निर्माण करण्याची इच्छाही त्यांनी व्यक्त केली. प्रा. डॉ. अशोक सुनतकरी यांनी आपल्या प्रास्ताविकात, पीईएसच्या स्थापनेमागील डॉ. बाबासाहेब आंबेडकरांची भूमिका, त्यांनी घेतलेले कष्ट याविषयी भाष्य केले. सर्व प्राचार्य, इतर महाविद्यालयांचे मुख्याध्यापक, शिक्षक व शिक्षकेतर कर्मचारी याप्रसंगी उपस्थित होते. कार्यक्रम यशस्‍वी पार पाडण्यासाठी एनसीसी कॅडेट्स, एनएसएस स्वयंसेवक, शिक्षक, शिक्षकेतर कर्मचारी यांनी अथक परिश्रम घेतले.
..........