बेस्टमध्ये महिन्याभरात
३२ मोबाईल विसरले
सकाळ वृत्तसेवा
मुंबई, ता. १० : मुंबईकरांचा विसरभोळेपणा वाढला असून जून महिन्यात बेस्टच्या बसमध्ये ३२ मुंबईकर मोबाईल विसरले. हे सर्व मोबाईल बेस्ट प्रशासनाच्या ताब्यात असून ओळख पटवून संबंधितांनी ते घेऊन जावेत, असे आवाहन बेस्ट प्रशासनाकडून करण्यात आले आहे.
जूनमध्ये बेस्टच्या बसमध्ये विविध कंपन्यांचे मोबाईल मुंबईकर विसरले आहेत. महिनाभरापासून हे मोबाईल बेस्ट प्रशासनाकडे पडून आहेत. त्यावर अद्याप कुणीही दावा केलेला नाही. त्यामुळे बेस्ट प्रशासनाची मोठी पंचायत झाली आहे. प्रशासनाने सापडलेल्या मोबाईलची यादी प्रसिद्ध केली असून त्यात मोबाईल सापडलेल्या बसचा क्रमांक, तारीख आणि मार्ग देण्यात आला आहे. जेणेकरून संबंधित प्रवाशापर्यंत माहिती पोहोचेल. कुलाबा येथील ‘बेस्ट भवन’मध्ये हे मोबाईल जमा असून १५ ऑगस्टपूर्वी ओळख पटवून ते घेऊन जाण्याचे आवाहन बेस्टने केले आहे.