भांडुपमध्ये विजयाचा
गुलाल उधळायला येणार
मुख्यमंत्री एकनाथ शिंदे यांची ग्वाही
सकाळ वृत्तसेवा
मुंबई, ता. १७ : भांडुप विधानसभेत महायुतीचे उमेदवार म्हणून अशोक पाटील निवडणूक रिंगणात आहेत. त्यांचा विजय निश्चित असून शनिवारी पाटील यांच्या विजयाचा गुलाल उधळायला भांडुपला नक्की येईन, अशी ग्वाही आज मुख्यमंत्री एकनाथ शिंदे यांनी दिली.

महायुतीचे उमेदवार म्हणून शिवसेना शिंदे गटाने अशोक पाटील यांना भांडुप विधानसभेतून उमेदवारी दिली आहे. त्यांच्या प्रचारासाठी मुख्यमंत्री एकनाथ शिंदे यांच्या सभेचे गाढव नाका येथे आयोजन केले होते. मुख्यमंत्री सायंकाळी नाशिकमध्ये असल्याने त्यांना सभेला पोहोचता आले नाही. त्यांनी फोनद्वारे मतदारांशी संवाद साधून अशोक पाटील यांना बहुमताने विजयी करण्याचे आवाहन केले. तसेच, तांत्रिक कारणामुळे आपण या सभेला उपस्थित राहू शकलो नसलो तरी विजयी सभेला गुलाल उधळायला नक्की येईन, असा विश्वास त्यांनी व्यक्त केला.
------
मुंबई खड्डेमुक्त करणार!
आपल्याला खड्डेमुक्त मुंबई करायची असून त्यासोबत भांडुपचाही कायापालट करायचा आहे, त्यासाठी आपण काम करत असल्याचे एकनाथ शिंदे यांनी सांगितले. तसेच, ज्यांनी बाळासाहेब यांच्या विचारांशी गद्दारी केली, त्यांना धडा शिकविण्यासाठी पाटील यांना उमेदवारी दिली आहे. पाटील यांच्यामागे मी ठामपणे उभा आहे. येथील सर्व विकास योजना पूर्ण केल्या जातील, असा शब्दही त्यांनी दिला.
-------
दुसऱ्यांदा फोनवरून भाषण
भांडुपमध्ये आयोजित केलेल्या सभेला फोनवरून संबोधित करण्याची दुसरी वेळ आहे. आज मुख्यमंत्री पोहोचू न शकल्याने फोनवरून भाषण केले. शनिवारी याच ठिकाणी महाविकास आघाडीचे उमेदवार रमेश कोरगावकर यांच्यासाठी आयोजित सभेला उद्धव ठाकरे येऊ शकले नव्‍हते. त्यांनी त्याबद्दल फोनवरून दिलगिरी व्‍यक्त केली होती. वाहतूक कोंडीमुळे ते पोहोचू शकले नव्हते.
------