माथेरान, ता. ३ (बातमीदार) : माथेरानला लागूनच असलेल्या पेब किल्ल्यावर ट्रेकिंगसाठी गेलेली महिला अचानक दरीत पडल्याची घटना शनिवारी (ता. २) सकाळी घडली. रेस्क्यू टीम आणि माथेरान पोलिसांच्या अथक परिश्रमाने महिलेला ७०० फूट खोल दरीतून काढण्यात यश आले.
माथेरान हे जागतिक दर्जाचे पर्यटनस्थळ असल्याने नेहमी पर्यटक माथेरानमध्ये येत असतात. या पर्यटकांमध्ये ट्रेकिंगची आवड असणाऱ्या ग्रुपमध्ये एक महिला शनिवारी सकाळच्या सुमारास पेब किल्ल्याकडे ट्रेकिंग करत होती. त्या वेळी अचानक तिचा पाय घसरल्यामुळे ती ७०० फूट खोल दरीत पडली. दरीत पडूनसुद्धा ती महिला जिवंत होती.

दरीतून ‘वाचवा, वाचवा’ असा आवाज आल्यानंतर पेब किल्ल्यावर असणाऱ्या पुजाऱ्याने तिचा आवाज ऐकून पोलिसांना माहिती दिली. माथेरान पोलिस ठाण्याचे सहायक पोलिस निरीक्षक शेखर लव्हे यांनी त्वरित सह्याद्री रेस्क्यू टीमला पाचारण केले. सह्याद्री रेस्क्यू टीमचे वैभव नाईक, सुनील कोळी, चेतन कळंबे, संदीप कोळी, महेश काळे, अक्षय परब, सुनील ढोले यांनी टॉर्चसह दुपारी १ वाजता सर्व रेस्क्यूचे साहित्य घेऊन थेट पेब किल्ला गाठला. सहायक पोलिस निरीक्षक गणेश गिरी, पोलीस नाईक घनश्याम पालवे, पोलिस शिपाई प्रशांत गायकवाड, दामोदर खतेले, वन विभागाचे कर्मचारी तसेच आदीवासी बांधव हेसुद्धा रेस्क्यू टीमच्या मदतीला होते.

सायंकाळी सहा वाजता आले यश
अंदाजे ७०० फूट खोल दरीत अडकून पडलेल्या महिलेला धीर देत रॅपलिंगचे दोर दरीत सोडून अतिशय कठीण जागेतून महिलेपर्यंत पोहचले. तिला धीर दिल्यानंतर दोरीला बांधून खोल दरीतून सुखरूप बाहेर काढले. सायंकाळी सहाच्या दरम्यान महिलेला मुख्य मार्गावर आणण्यात यश आले.