कळवा, ता. १ (बातमीदार) : खारेगाव टोलनाक्याजवळ पारसिक चौपाटीजवळ टेम्पोतून सव्वासहा लाख रुपयांचा गुटखा विक्रीसाठी घेऊन जाणाऱ्या टेम्पोचालकाला कळवा पोलिसांनी अटक केली. खारेगाव टोलनाकामार्गे पारसिक सर्कल येथून टेम्पोत बेकायदा गुटखा घेऊन जाणार असल्याची माहिती कळवा पोलिस ठाण्यातील सहायक पोलिस निरीक्षक दत्तात्रेय यादव आणि पोलिस निरीक्षक स्वप्नील खताले यांच्या पथकाला मिळाली होती. त्यानुसार कळवा पोलिसांनी शुक्रवारी (ता. ३१) सायंकाळी सापळा रचला होता. पाच वाजण्याच्या सुमारास टेम्पोचालक आकाश रंजन पाटील (वय ३२) याला ताब्यात घेऊन झडती घेतली असता सहा लाख २६ हजार रुपये किमतीचा गुटखा विक्रीसाठी घेऊन जात असल्याचे तपासात समोर आले. कळवा पोलिसांनी चालक आकाश पाटील याच्याविरोधात गुन्हा दाखल करत त्याला अटक केली.