सकाळ वृत्तसेवा
नवी मुंबई, ता. १० ः नवी मुंबई महापालिकेतर्फे शहरभर राबविण्यात येणाऱ्या विविधांगी स्वच्छता उपक्रमात लोकसहभागावर व त्यातही महिलांच्या सहभागावर विशेष भर दिला जात आहे. घरातील दैनंदिन स्वच्छतेमध्ये महिला फार महत्त्वाची भूमिका पार पाडत असतात. त्यामुळे सार्वजनिक स्तरावरील स्वच्छता मोहिमांमध्येही सर्व वयोगटातील महिलांचे योगदान महत्त्वपूर्ण आहे.
स्वच्छता आणि आरोग्य यांचा परस्पर संबंध लक्षात घेऊन नेरूळ येथील महिलांच्या पिंकेथॉन या संस्थेने उपक्रम हाती घेतला आहे. या उपक्रमात २५ हून अधिक महिलांनी सहभाग घेत सेक्टर १९ नेरूळ येथील आरटीओ ट्रॅक भोवतालचा परिसर स्वच्छ केला होता. जागतिक आरोग्य दिनाचे औचित्य साधून झालेल्या या उपक्रमात प्लास्टिकच्या बाटल्या, प्लास्टिक व इतर कचरा गोळा करून पिंकेथॉनच्या महिलांनी एक आदर्श उभा केला. अशाच प्रकारे इंडियन मेरिटाईम युनिव्हर्सिटी येथील विद्यार्थ्यांनी टीएस चाणक्य सभोवतालच्या खाडी परिसरात स्वच्छता मोहीम हाती घेऊन सागरी किनारा स्वच्छ करण्यात आला आहे. या उपक्रमातही विद्यार्थिनींचा मोठ्या प्रमाणावर सहभाग होता. या मोहिमेत खारफुटी परिसरातील कचरा, तसेच प्लास्टिक सहभागी विद्यार्थी व त्यांचे प्राध्यापक व स्वयंसेवक यांनी गोळा करून जनजागृती केली. तसेच ५० हून अधिक विद्यार्थिनी, विद्यार्थी व नागरिकांनी खाडीकिनाऱ्याचा परिसर कचराविरहित करण्याचा संकल्प तडीस नेला.
--------------------------------------------------
महिलांनी शहर स्वच्छतेकडे विशेष लक्ष देण्याच्या दृष्टीने सार्वजनिक ठिकाणी कचरा टाकला जाणार नाही याची दक्षता घ्यावी, तसेच आपल्या घरातूनच कचरा ३ प्रकारे वर्गीकरण करून कचरा गाडीत द्यावा. सोसायटीच्या आवारात कंपोस्ट पीट्स तयार करावेत, तसेच दैनंदिन वापरातून प्लास्टिक हद्दपार करावे.
- राजेश नार्वेकर, आयुक्त, नवी मुंबई महापालिका
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.