नालासोपारा, ता. १० (बातमीदार) : विरारमध्ये एका हायप्रोफाईल कॉल सेंटरचा पोलिसांनी भांडाफोड करत ४९ जणांना अटक करून त्यांच्याकडून १६ लाख १९ हजार रुपयांचा मुद्देमाल जप्त केला आहे. या कॉल सेंटरमधून इन बाऊंड कॉलवरून, पेपल ऑस्ट्रेलिया बँकेच्या ग्राहकांचे येणारे कॉल स्वीकारून, माहिती चोरून मोठी फसवणूक करीत असल्याचे उघड झाले आहे. याप्रकरणी अर्नाळा सागरी पोलिस ठाण्यात गुन्हा दाखल केला आहे. या सर्वांना सोमवारी (ता. १०) वसई न्यायालयात हजर केले असता त्यांना १२ एप्रिलपर्यंत पोलिस कोठडी सुनावण्यात आल्याची माहिती पोलिस उपायुक्त सुहास बावचे यांनी दिली आहे.

विरारमधील राजोडी समुद्र किनाऱ्यावरील ‘ओएसी पेंट बॉल अरेना’ या फार्महाऊसमध्ये परराज्यांतील तरुण-तरुणी बोगस कॉल सेंटर चालवून ऑस्ट्रेलियन स्थित एका बँकेच्या ग्राहकांची फसवणूक करीत असल्याची माहिती वरिष्ठ पोलिस निरीक्षक कल्याणराव करपे यांना मिळाली होती. यावरून पोलिस उपायुक्त सुहास बावचे यांच्या मार्गदर्शनाखाली रविवारी (ता. ९) या ठिकाणी सापळा रचून छापा टाकला असता या आंतराष्ट्रीय बोगस कॉल सेंटरचा भांडाफोड झाला. या ठिकाणी ३७ पुरुष, १० महिला काम करताना आढळून आल्या. अटक केलेले सर्व जण हरियाणा, पंजाब, दिल्ली, उत्तर प्रदेशचे असून ते उच्चशिक्षित आहेत.