भिवंडी, ता. १ (बातमीदार) : भिवंडीतून अपहरण केलेल्या सहा महिन्यांच्या बालकाचा दोन लाखांत सौदा करून त्याची विक्री झारखंड येथे करण्यात आली होती. पोलिसांनी याप्रकरणी कसोशीने तपास करून झारखंडमधून मुलासह आरोपींना भिवंडीत घेऊन बालकास त्याच्या आईच्या स्वाधीन केले.
भिवंडी शहरातील न्यू आझादनगर या झोपडपट्टी भागात शहाबाज मोहम्मद अन्सारी आणि त्याची पत्नी शहाना अन्सारी हे दाम्पत्य राहते. रमजान महिन्याच्या खरेदीच्या निमित्ताने शहानाने आपल्या सहा महिन्यांच्या अरबाज या मुलास मैत्रीण फातिमा भाभी हिच्या घरी १४ एप्रिल रोजी सकाळी १० वाजता सोडून ठेवले होते. दुपारी हे दाम्पत्य खरेदी करून परतले तेव्हा फातिमाकडे अरबाज मिळाला नाही. परिसरात शोध घेऊन या दाम्पत्याने शांतिनगर पोलिस ठाण्यात तक्रार नोंद केली. त्यावरून पोलिसांनी खबरी आणि सीसीटीव्हीद्वारे माहिती घेतली असता अपहरण करणारा त्याच भागातला अफरोज अबूबकर शेख (वय २६) याला पोलिसांनी ताब्यात घेतले. त्याने बालकाचा सौदा करून तालुक्यातील येवई नाक्यावरील शंभू सोनाराम साव (वय ५०) यास दिले. त्याने बालकाला झारखंड येथील मंजुदेवी महेश साव (वय ३४) हिला दोन लाखांत विकले, अशी माहिती मिळाल्यानंतर पोलिसांचे तपास पथक झारखंड येथे जाऊन जितकुण्डी गावातून आरोपी महिलेसह अरबाज याला सुरक्षितरीत्या घेऊन भिवंडीस आले. पोलिस उपायुक्त नवनाथ ढवळे यांनी अरबाजला त्याच्या आईच्या म्हणजेच शहाना अन्सारी हिच्या स्वाधीन केले. शांतिनगर पोलिस ठाण्याच्या पोलिसांनी आरोपीविरोधात गुन्हा दाखल करून त्यांना अटक केली आहे.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.